23 снежня, Мінск /Кар. БЕЛТА/. Маладзёжны тэатр эстрады запрашае дзяцей 24 снежня на навагодні квест і прэм'еру казкі, паведамілі карэспандэнту БЕЛТА ў канцэртным аддзеле.
"Маладзёжны тэатр эстрады да зімовых свят падрыхтаваў па-сапраўднаму маладзёжныя паказы, якія, упэўнены, будуць актуальны для сучасных дзяцей. Так, з 24 снежня па 5 студзеня мы запрашаем дзяцей на казачны навагодні квест "Цік-ток ёлка". Ён пройдзе па пр.Пераможцаў, 14, - расказалі ў тэатры. - Юных гледачоў, а таксама іх бацькоў чакае займальны сюжэт - Баба-Яга ператворыцца ў прадзюсара і разам з Дзедам Марозам зробіць музычны кліп".
Акрамя таго, таксама ў гэту суботу адбудзецца прэм'ера казкі "Як мядзведзь Патапыч Новы год ратаваў". Яна адбудзецца на сцэне Маладзёжнага тэатра эстрады. "Сюжэт казкі будуецца вакол выратавання свята галоўным героем - Міхаілам Патапычам, а таксама яго дружнай світай. А падкопы ім будзе строіць Змей Гарыныч", - дадалі ў канцэртным аддзеле.
Стаць удзельнікам казачнага дзейства можна з 24 снежня па 8 студзеня.-0-
