5 ліпеня, Магілёў /Кар. БЕЛТА/. Спектаклі на свежым паветры з'явіліся ў ліпеньскай афішы Магілёўскага абласнога тэатра лялек. Паказы праходзяць на базе этнаграфічнага комплексу "Зялёны гай" абласнога цэнтра, расказалі карэспандэнту БЕЛТА ва ўстанове культуры.
"Гэта зусім новы для нас фармат работы, які мы пачалі практыкаваць з пачатку бягучага месяца, - адзначылі субяседнікі. - Першым спектаклем на свежым паветры, які ўбачылі магіляўчане, стала пастаноўка "Муха-цакатуха". Вясёлую танцавальную казку для самых юных гледачоў паглядзелі амаль 70 чалавек - дзяцей і іх бацькоў. Акрамя таго, пасля паказу была арганізавана работа фотазоны, дзе кожны жадаючы мог сфатаграфавацца з любімымі лялечнымі персанажамі".
Як расказалі ў тэатры лялек, супрацоўніцтва з этнаграфічным комплексам прадоўжыцца на працягу ўсяго летняга перыяду, а таксама ў першыя тыдні восені. На адкрытых пляцоўках можна будзе паглядзець спектаклі не толькі для дзяцей, але і для дарослай аўдыторыі. Адміністрацыя тэатра таксама плануе арганізаваць такія выступленні і ў іншых раёнах горада.
Паказы спектакляў на свежым паветры прымеркаваны да Года народнага адзінства.-0-
