24 кастрычніка, Мінск /Кар. БЕЛТА/. Нацыянальная кінастудыя "Беларусьфільм" здымае стужку пад рабочай назвай "Ліст чакання" аб лёсах урачоў-кардыёлагаў. Першы здымачны дзень прайшоў на базе Рэспубліканскага навукова-практычнага цэнтра "Кардыялогія", перадае карэспандэнт БЕЛТА.
"Кардыёлагі - гэта людзі, якія трымаюць у руках жывое чалавечае сэрца. Няхай гэта будзе сімвалам нейкім, нейкай знакавай цытатай, тырадай, але так і ёсць. Яны сапраўды трымаюць у руках чалавечае сэрца і стараюцца, каб яно было жывое як мага даўжэй. Для мяне гэта вельмі шмат значыць", - адзначыў кінарэжысёр-пастаноўшчык, заслужаны дзеяч культуры Беларусі, народны артыст Аляксандр Яфрэмаў.
Фільм раскажа аб лёсах урачоў-кардыёлагаў нашай краіны, іх складанай прафесіі, узаемаадносінах у прафесіі і сям'і. У цэнтры ўвагі - сацыяльна актыўная пазіцыя сучасных урачоў, якія на першае месца ставяць не асабістыя выгады, а здароўе пацыентаў. І робяць свой выбар, кіруючыся грамадзянскай пазіцыяй і імкненнем развіваць айчынную медыцыну не толькі на сваім узроўні, але і на міжнародным, дзелячыся сваімі поспехамі і прафесійнымі дасягненнямі з калегамі з іншых краін.
Паводле слоў кінарэжысёра-пастаноўшчыка, фільм не аб рэальных людзях, але ў іх ёсць рэальныя прататыпы. "Гэта выдатныя людзі, якімі павінна ганарыцца краіна, таму што ўзровень іх прафесіяналізму настолькі высокі, што ён параўнальны з любой кардыялогіяй, якая дасягнула самых высокіх вяршынь. Мы павінны ведаць аб гэтым, мы павінны імі ганарыцца", - падкрэсліў Аляксандр Яфрэмаў.
"Калі выйсці за межы жанру, то, у прынцыпе, любая карціна абавязана расказваць аб часе, у якім мы жывём, аб людзях, якія прадстаўляюць гэты час, аб рэальных праблемах, якія існуюць у гэтых канкрэтных людзей. І мне здаецца, гэта асноўная задача кіно, - прадоўжыў кінарэжысёр-пастаноўшчык. - Хочацца, каб гэты расказ аб нашым часе, аб нашых сучасніках, аб героях гэтага часу, аб яго праблемах, аб поспехах стаў традыцыяй кінастудыі "Беларусьфільм".
Кінастужка "Ліст чакання" будзе мастацкай. "Ніякага дакументалізму. З майго пункту гледжання, дакументальны фільм не такі пераканаўчы, як мастацкая карціна. Будуць дзве серыі, спачатку будзе версія кіно для пракату ў кінатэатрах", - дадаў Аляксандр Яфрэмаў.
"Я не заяўляю, што мы абавязкова пачнём штосьці новае, гэта заўсёды было ў кіно. Але за апошні час такое неяк страцілася ў жанры. Часта нейкая любоўная або міліцэйская гісторыя, а рэальных людзей, якія жывуць побач з намі, іх праблемы мы неяк пакінулі ўбаку. І мне хацелася, каб гэта вярнулася, вярнуліся тыя героі, аб якіх мы часам забываем проста", - рэзюмаваў кінарэжысёр-пастаноўшчык.
Сцэнарый фільма стварылі пры кансультацыйнай падтрымцы работнікаў аховы здароўя. Кінааператарам-пастаноўшчыкам карціны выступіў Максім Куроўскі, мастаком-пастаноўшчыкам па дэкарацыях - Ігар Хруцкі, мастаком-пастаноўшчыкам па касцюмах - Ніна Гурло.-0-
