23 студзеня, Гомель /Кар. БЕЛТА/. Ушаноўванне лаўрэатаў абласной літаратурнай прэміі імя Кірылы Тураўскага адбылося сёння ў Гомельскім аблвыканкаме, перадае карэспандэнт БЕЛТА.
Узнагароды па выніках 2019 года - а гэта не толькі грашовая прэмія, але і выданне твораў лаўрэатаў - уручыў старшыня аблвыканкама Генадзь Салавей. У намінацыі "Паэзія" лепшай прызнана Алена Мацвіенка, "Проза" - Міхаіл Кавалёў, "Дзіцячая літаратура" - Соф'я Шах, "Публіцыстыка і літаратурная крытыка" - Вольга Раўчанка, "Адкрыццё года" - Вольга Астапенка.
Для таго каб жыхары вобласці змаглі азнаёміцца з лепшымі творамі гомельскіх аўтараў, палавіну тыражу накіруюць у публічныя бібліятэкі і бібліятэкі ўстаноў адукацыі.
Старшыня абласнога аддзялення Саюза пісьменнікаў Беларусі Уладзімір Гаўрыловіч падзякаваў аблвыканкаму за падтрымку пісьменніцкай працы. Ён адзначыў, што на гомельскай зямлі ёсць нямала таленавітых паслядоўнікаў вядомых майстроў мастацкага слова.
Рашэнне аб падтрымцы лепшых пісьменнікаў рэгіёна было прынята Гомельскім аблвыканкамам у 2013 годзе. З таго моманту лаўрэатамі прэміі сталі 34 аўтары.-0-
