9 снежня, Мінск /Кар. БЕЛТА/. Квесты, выстаўкі і спектаклі падрыхтаваў да зімовых свят Нацыянальны цэнтр мастацкай творчасці дзяцей і моладзі, паведаміла сёння журналістам мастацкі кіраўнік установы Надзея Коршунава, перадае карэспандэнт БЕЛТА.
На YouTube-канале nchtdm 10 снежня ў 11.30 будзе дадзены анлайн-старт рэспубліканскай дабрачыннай акцыі "Нашы Дзеці", дзе прагучаць віншаванні ад усіх фіналістаў рэспубліканскага агляду-конкурсу Дзядоў Марозаў і Снягурачак "Ёлка-Фэст". У 11.45 пачнецца трансляцыя праграм-пераможцаў у намінацыях "Лепшая сюжэтна-гульнявая праграма", "Лепшы Дзед Мароз і Снягурачка". У фінале конкурсу прынялі ўдзел 14 каманд з устаноў агульнай сярэдняй і дадатковай адукацыі дзяцей і моладзі - пераможцы і прызёры абласных і Мінскага гарадскога этапаў конкурсу.
Выстаўка лепшых работ XXIV Рэспубліканскай выстаўкі-конкурсу дэкаратыўна-прыкладной творчасці "Калядная зорка" адкрыецца 11 снежня. У час яе работы будзе арганізавана экскурсія "Зімовыя гісторыі", праграма якой разлічана на малодшы і сярэдні школьны ўзрост. Наведвальнікі выстаўкі змогуць азнаёміцца з традыцыямі святкавання Новага года і Каляд, даведацца аб незвычайных калядных гісторыях, зімовых відах спорту, а таксама паўдзельнічаць у забаўляльных квізах.
Акрамя таго, у час зімовых канікулаў дзеці змогуць паўдзельнічаць у навагодняй інтэрактыўнай праграме "Чароўны будзільнік Дзеда Мароза" і ўбачыць галоўных чараўнікоў зімы. "Юнакоў і дзяўчат да 12 гадоў запрашаюць на казачны спектакль "Аднавух і першая зіма", які будзе напоўнены музыкай, танцамі, весялосцю, інтэрактыўнымі конкурсамі. Вясёлая гісторыя з прыгодамі будзе расказваць аб дружбе, аб тым, як важна індывідуальнасць кожнага, хто цябе акружае. Рассадка ў зале - з захаваннем сацыяльнай дыстанцыі", - расказала мастацкі кіраўнік.
У НЦМТДМ запланаваны квест "У пошуках Дзеда Мароза вакол свету". Хлопчыкаў і дзяўчынак чакаюць захапляльныя квізы, галаваломкі, конкурсы, навагодняя дыскатэка і майстар-клас. Таксама ўсе жадаючыя могуць азнаёміцца з адвент-календаром, у якім на кожны дзень распісаны навагоднія заданні і гульні. Яго можна знайсці на сайце цэнтра і ў яго афіцыйным Instagram-акаўнце.-0-