2 снежня, Мінск /Кар. БЕЛТА/. Міралюбнасць і добрасуседства гістарычна з'яўляюцца неад'емнай часткай прыроды беларусаў, сказаў намеснік кіраўніка Адміністрацыі Прэзідэнта Андрэй Кунцэвіч сёння ў час прэзентацыі альбома "Шматнацыянальная Беларусь" лаўрэата прэміі Прэзідэнта Беларусі "За духоўнае адраджэнне" Уладзіміра Ліхадзедава, перадае карэспандэнт БЕЛТА.
"У нашай дзяржаве жывуць прадстаўнікі 156 нацыянальнасцей, 25 рэлігійных канфесій. І кожны з іх узбагачае нашу культуру, яе духоўную спадчыну, фарміруе вобраз Беларусі як краіны, дзе рады кожнаму, хто прыходзіць сюды з дабром. Дзякуючы палітыцы нашага Прэзідэнта, Беларусь адна з нямногіх краін на постсавецкай прасторы, якая пазбегла канфліктаў на міжнацыянальнай і рэлігійнай глебе", - адзначыў Андрэй Кунцэвіч.
Паводле яго слоў, новая кніга Уладзіміра Ліхадзедава нагадвае аб тым, што міралюбнасць, паважлівае стаўленне да іншых нацыянальнасцей, добрасуседства гістарычна з'яўляюцца неад'емнай часткай прыроды беларусаў. "Як мне здаецца, гэта выданне дазваляе ўсім нам паглядзець на сённяшні дзень праз прызму багатай гісторыі Беларусі, яе шматвяковых традыцый, - падкрэсліў намеснік кіраўніка Адміністрацыі Прэзідэнта. - За кожным фотаздымкам, паштоўкай, сюжэтам у гэтай кнізе адчуваецца неверагодная сіла, энергія нашага роду і зямлі. Кніга вяртае чытача да вядомага тэзіса аб тым, што нас шмат, мы розныя, але Беларусь у нас адна. І калі сучаснаму пакаленню беларусаў выпаў унікальны шанц стварыць першую ў гісторыі самастойную беларускую дзяржаву, мы, безумоўна, павінны распарадзіцца ім належным чынам, вучыцца ў нашых продкаў паважаць адзін аднаго, уменню берагчы мір і згоду на роднай зямлі, і, вядома ж, уменню шанаваць тое, што было зроблена папярэднімі пакаленнямі. Менавіта такую Беларусь - добразычлівую, гасцінную, самабытную і шматгранную - можна знайсці на старонках новага выдання аўтара".
Альбом "Шматнацыянальная Беларусь" Уладзіміра Ліхадзедава выйшаў у серыі гісторыка-асветнага праекта "У пошуках страчанага". У аснове выдання - больш за 400 паштовак і фатаграфій канца XIX - пачатку XX стагоддзя з прыватнай калекцыі аўтара. На збор матэрыялаў для кнігі пайшло 45 гадоў. Каментарыі да ілюстрацый прадстаўлены на беларускай, рускай і англійскай мовах.-0-
