19 лістапада, Мінск /Кар. БЕЛТА/. Рэспубліканскі конкурс "Нацыянальная прэмія ў галіне выяўленчага мастацтва" праводзіцца з 1 лістапада па 15 лютага 2020 года. Такая інфармацыя размешчана на сайце Міністэрства культуры, паведамляе БЕЛТА.
Міністэрствам культуры дырэкцыяй конкурсу вызначаны Нацыянальны гістарычны музей Беларусі. Конкурс праводзіцца па 10 намінацыях: "Жывапіс", "Графіка", "Скульптура", "Дызайн", "Актуальнае мастацтва" (арт-аб'ект, інсталяцыя), "Мастацкая фатаграфія", "Манументальнае і манументальна-дэкаратыўнае мастацтва", "Дэкаратыўна-прыкладное мастацтва", "Мастацтвазнаўства і крытыка", "Творчы дэбют".
Камісіяй будзе адабрана па 10 работ у кожнай намінацыі для ўдзелу ў Рэспубліканскай выстаўцы сучаснага выяўленчага мастацтва. Па выніках адкрытага прагляду і ацэнкі конкурсных матэрыялаў журы вызначыць пераможцаў.
"Конкурс стане значнай падзеяй у культурным жыцці Беларусі і важным стымулам да далейшага развіцця выяўленчага мастацтва нашай краіны", - адзначылі ў Міністэрстве культуры. -0-
