22 чэрвеня, Брэст /Кар. БЕЛТА/. У Брэсце сёння прэзентавалі кнігу "1941-1944. Беларусь - Расія. Партызанскі рух у гады Вялікай Айчыннай вайны", перадае карэспандэнт БЕЛТА.
Пастаянны камітэт Саюзнай дзяржавы падтрымлівае сумесную выдавецкую праграму па выпуску кніг, якія могуць быць цікавыя жыхарам Беларусі і Расіі. Напрыклад, у мінулым годзе выйшла выданне "Подзвіг савецкага народа бессмяротны...", прысвечанае новым экспазіцыям Брэсцкай крэпасці-героя і Музея Перамогі на Паклоннай гары ў Маскве. Цяпер убачыла свет кніга "1941-1944. Беларусь - Расія. Партызанскі рух у гады Вялікай Айчыннай вайны". На яе старонках расказваецца пра новыя экспазіцыі Беларускага дзяржаўнага музея гісторыі Вялікай Айчыннай вайны і Бранскага дзяржаўнага краязнаўчага музея.
"Хочам, каб гэтыя кнігі прыйшлі ў бібліятэкі школ, ваенных навучальных устаноў, ВНУ і тэхнікумаў, працоўных калектываў. Гэта будзе добры знак для таго, каб людзі ведалі, якім быў партызанскі рух у Беларусі і Расіі", - сказаў дзяржаўны сакратар Саюзнай дзяржавы Дзмітрый Мезенцаў. Ён дадаў, што першыя экзэмпляры кнігі перадалі прэзідэнтам Беларусі і Расіі.
У ілюстраваным выданні больш за 200 старонак. Гэта своеасаблівы альбом, дзе апублікаваны фатаграфіі экспанатаў, партрэты ўдзельнікаў партызанскага руху і іншыя эксклюзіўныя здымкі.
"У мінулым годзе мы перагледзелі дзяржаўны інфармацыйны заказ у бок павелічэння фінансавання такіх кніг. Можа, моладзь цяпер менш чытае. Але гэтыя кнігі - дастойны класічны праваднік гістарычнай праўды, якая вельмі патрэбна для фарміравання светапогляду маладога пакалення, - падкрэсліў міністр інфармацыі Уладзімір Пярцоў. - Зробім усё магчымае, каб і далей без скажэння даносіць да маладога пакалення гісторыі простых людзей, сем'яў, ветэранаў, ахвяр, малалетніх вязняў. Паколькі праўда - гэта тое, чым мы можам процістаяць мастацкім спекуляцыям і іншым метадам па перапісванні гісторыі".
У Музеі абароны Брэсцкай крэпасці праходзіць круглы стол, прысвечаны 81-й гадавіне з пачатку Вялікай Айчыннай вайны. У ім прымаюць удзел беларускія і расійскія дзяржаўныя дзеячы, журналісты, гісторыкі, супрацоўнікі музеяў і архіваў. Некаторыя спікеры падключыліся да мерапрыемства ў анлайн-рэжыме. Удзельнікі круглага стала апоўдні мінутай маўчання ўшанавалі памяць ахвяр вайны.-0-
