ДЗЯРЖОРГАНЫДЗЯРЖОРГАНЫ
Аўторак, 13 красавіка 2021
Мінск Малавоблачна +6°C
Усе навіны
Усе навіны
Культура
14 кастрычніка 2020, 13:05

Кінафестываль "Лістапад" пройдзе пад слоганам "Магія вобраза"

14 кастрычніка, Мінск /Кар. БЕЛТА/. XXVII Мінскі міжнародны кінафестываль "Лістапад" пройдзе з 6 па 13 лістапада пад слоганам "Магія вобраза", які звяртаецца да ўнікальнай прыроды кіно. У аснове візуальнай канцэпцыі гэтага года - даніна павагі легендарнаму беларускаму фільму "Горад майстроў". Аб гэтым БЕЛТА паведамілі арганізатары.

"Слоган "Магія вобраза" лішні раз падкрэслівае, што кіно - гэта таінства, магічны працэс. Яно можа раскрыць свет вакол нас ва ўсёй яго паўнаце, складанасці і багацці. Выява, па-майстэрску пабудаваная мізансцэна, спалучэнні колеру і цені зачароўваюць, тлумачаць нюансы сюжэту і служаць галоўнымі ключамі да сэнсаў і ідэй экранных гісторый", - адзначылі арганізатары.

У візуальным рашэнні фестывалю - герой казачнай прытчы Уладзіміра Бычкова "Горад майстроў". Знакавай беларускай кінакарціне ў гэтым годзе спаўняецца 55 гадоў. Стылізаваны пад маляўнічую сярэдневяковую баладу, фільм зачараваў многія пакаленні беларусаў. Музыка Алега Каравайчука надала казачнай містэрыі інтэлектуальную пачуццёвасць. "Горад майстроў" апявае свабоду і патрыятызм, гераізм і волю, ператвараючы казку ў кіно на ўсе часы.

Для замежных членаў журы і прадстаўнікоў медыя дырэкцыя форуму правядзе "Лістапад" у анлайн-фармаце. Паказы для гледачоў пройдуць у кінатэатрах, дзе будзе забяспечана сацыяльная дыстанцыя і ўсе неабходныя меры засцярогі. "Фестываль гэтага года ствараецца ў няпростых для ўсёй кінаіндустрыі ўмовах. Аднак перамога сілы кінамастацтва цяпер можа стаць панацэяй ад многіх нягод. Нягледзячы на ўсе цяжкасці, жыццё не стаіць на месцы. Менавіта таму фармат фестывалю ў бягучым годзе будзе адрознівацца ад усіх папярэдніх", - расказалі арганізатары.

Фестываль "Лістапад" акрэдытаваны Міжнароднай федэрацыяй асацыяцый кінапрадзюсараў (FIAPF) як конкурсны фестываль фільмаў, створаных у краінах былога сацыялістычнага лагера: краінах СНД, Цэнтральнай і Паўднёва-Усходняй Азіі, краінах Балтыі, Усходняй і Цэнтральнай Еўропы, на Кубе. Арганізатарам выступае Цэнтр візуальных і выканальніцкіх мастацтваў "АРТ Карпарэйшн". Заснавальнікі - Міністэрства культуры і Мінскі гарадскі выканаўчы камітэт.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі