8 снежня, Віцебск /Кар. БЕЛТА/. У мастацкім музеі Віцебска працуе выстава акварэлей мэтра Фелікса Гумена "Казка чацвёртага сезона", паведамілі БЕЛТА ва ўстанове.
У экспазіцыю ўвайшлі 20 зімовых пейзажаў 2017-2020 гадоў. Мастак пісаў Віцебск і яго прыгарады Лужасна, Баронікі. Акварэлі напісаны з дзіўным пачуццём і майстэрствам: выразнасць контураў, ліній, эмацыянальныя пераходы колеру, буйныя формы. Мастак стварае свае работы ў яркім парыве душы, аддаючы ў іх сваю энергетыку і неардынарнасць. "Аўтар не толькі дорыць людзям сваю творчасць, але і вучыць стаўленню да мастацтва і жыцця ў цэлым. Багацце тэм, разнастайнасць тэхнічных прыёмаў, маштабнасць мыслення, смелае акварэльнае пісанне - усё гэта знайшло сваё адлюстраванне ў творчасці Фелікса Гумена", - адзначылі ў музеі.
Выстава "Казка чацвёртага сезона" прадоўжыцца па 28 лютага 2021 года.
Фелікс Фёдаравіч Гумен нарадзіўся 28 сакавіка 1941 года ў вёсцы Кальцова Кумарскага раёна Амурскай вобласці (Расія) у сям'і ваеннаслужачага. Дзяцінства і юнацтва прайшлі ў частых пераездах па месцы службы бацькі. У 1958 годзе Фелікс Гумен паступіў на мастацка-графічны факультэт Віцебскага педінстытута. Ён быў першым у СССР, чый дыпломны праект прадстаўляў акварэль. Дзейнасць мастака адзначана Ганаровым знакам Міністэрства культуры Беларусі, медалём за заслугі ў выяўленчым мастацтве. Творы Фелікса Гумена знаходзяцца ў многіх музеях і прыватных калекцыях свету. У фондзе мастацкага музея Віцебска знаходзіцца больш за 1 тыс. работ майстра.-0-
