12 студзеня, Віцебск /Алеся Пушнякова - БЕЛТА/. У Наваполацку стартуе праект "Кінаўрокі ў школах свету", у час якога школьнікі будуць задзейнічаны ў здымках кароткаметражнага мастацкага фільма. Аб гэтым карэспандэнту БЕЛТА паведамілі ў Наваполацкім гарвыканкаме.
Міжнародны культурна-гуманітарны праект "Кінаўрокі ў школах свету" будзе праходзіць у Наваполацку з 12 па 15 студзеня. У горадзе пройдуць здымкі кароткаметражнага фільма "Чарадзеі", першы прагляд якога павінен адбыцца ў час святкавання 65-годдзя горада ў чэрвені бягучага года. Сёння ў наваполацкай сярэдняй школе нумар 1 пройдзе ўрачыстае мерапрыемства, на якім па традыцыі работнікаў кінаіндустрыі разаб'юць талерку перад пачаткам здымак.
Наваполацкія школьнікі ў якасці акцёраў змогуць паўдзельнічаць у стварэнні прафесійнага дзіцячага кароткаметражнага фільма выхаваўчага прызначэння, дзе яны раскажуць пра базавыя маральныя паняцці - дружбу, мужнасць, узаемадапамогу і інш. Усяго аўтары праекта плануюць стварыць 99 дзіцячых кінафільмаў, дзе будуць раскрывацца 99 маральных якасцей асобы.
"Гэты кінапраект нацэлены на стварэнне інавацыйнай сістэмы маральнага выхавання, якая ахоплівае ўсе ступені агульнай адукацыі. У маі 2022 года мы далучыліся да праекта і афіцыйнай кропкай яго адліку стала падпісанне пагаднення аб супрацоўніцтве паміж гарвыканкамам і кіраўнікамі праекта, што дазваляе нам на законных падставах выкарыстоўваць усе матэрыялы. Наваполацк стаў першым у Віцебскай вобласці, хто далучыўся да гэтай ініцыятывы", - адзначылі ў гарвыканкаме.
Усе знятыя стужкі знаходзяцца ў адкрытым доступе на афіцыйным сайце праекта. Акрамя ўдзелу ў здымках фільма, дзеці будуць глядзець і іншыя работы сваіх равеснікаў з усяго свету і абмяркоўваць убачанае, дзяліцца ўражаннямі, расказваць, як яны бачылі тое ці іншае паняцце і што змянілася ў іх адносінах да яго.
Арганізатарамі праекта выступаюць Наваполацкі гарвыканкам і аўтаномная некамерцыйная арганізацыя з Санкт-Пецярбурга сумесна з расійскай кінастудыяй дзіцячых і юнацкіх фільмаў "ІнтэлКіно".-0-
