ДЗЯРЖОРГАНЫДЗЯРЖОРГАНЫ
Флаг Субота, 23 верасня 2023
Мінск Пераменная воблачнасць +16°C
Усе навіны
Усе навіны
Культура
25 кастрычніка 2022, 15:25

Канцэрт-прысвячэнне беларускім кампазітарам дадуць у Брэсце 25 кастрычніка

Фота з архіва
Фота з архіва

25 кастрычніка, Брэст /Кар. БЕЛТА/. Сімфанічны аркестр Брэсцкага акадэмічнага тэатра драмы сёння ўвечары дасць канцэрт "Люблю цябе, Белая Русь", паведамілі карэспандэнту БЕЛТА ў тэатры.

Вечар прысвечаны Году гістарычнай памяці і прымеркаваны да 90-годдзя Беларускага саюза кампазітараў. У праграме прадстаўлены цэлы пласт папулярнай беларускай музыкі. "Гэта не проста канцэрт. Гэта такая вяха ў музычнай гісторыі, у гісторыі нашай дзяржавы, у гісторыі прафесійнага музычнага станаўлення. Для мяне гэта больш нават акцыя. Сёння будзе прадэманстравана музыка ад вытокаў беларускага прафесійнага мастацтва да нашых дзён", - адзначыў аўтар праекта дырыжор Аляксандр Сасноўскі.

У першым аддзяленні аркестр выканае творы заснавальнікаў беларускага прафесійнага музычнага мастацтва. Прагучыць другая частка Другой сімфоніі Рыгора Пукста, "Вальс Ніны" з музыкі Анатоля Багатырова да драмы М. Лермантава "Маскарад", знакамітае адажыа Яўгена Глебава з балета "Маленькі прынц", фінал Канцэрта для цымбалаў з аркестрам нумар 3 Дзмітрыя Смольскага. Таксама будзе прадстаўлена творчасць брэсцкіх кампазітараў Уладзіміра Солтана і Васіля Кандрасюка.

Другое аддзяленне прысвечана песеннаму жанру. У суправаджэнні аркестра творы беларускіх кампазітараў выканаюць лаўрэаты тэлепраекта "Маладыя таленты Беларусі" - студэнты Беларускай дзяржаўнай акадэміі музыкі Антон Карчэўскі і Кірыл Кучынскі, навучэнцы Мінскага дзяржаўнага каледжа мастацтваў Ганна Манжурава, Алеся Адамчык і Алеся Савіцкая, Брэсцкага музычнага каледжа Юлія Комар (цымбалы).

Адбудуцца дзве аркестравыя прэм'еры старшыні Беларускага саюза кампазітараў Алены Атрашкевіч. У выкананні аўтара прагучыць таката "У рытме танга" і "Вальс у рамантычным стылі". Таксама дуэт яе выхаванак выканае прэм'еру песні "А скрыпка спявала" на вершы беларускай паэтэсы Таццяны Мушынскай.

Завершыць канцэртны вечар твор заснавальніка беларускага песеннага жанру Ігара Лучанка - песня на вершы Алеся Ставера "Жураўлі на Палессе ляцяць". Яе выканаюць усе салісты - удзельнікі канцэрта, а таксама хор музычнай школы нумар 1 Брэста і Брэсцкага дзяржаўнага музычнага каледжа імя Р.Шырмы.

"Думаю, гэта будзе канцэрт-сенсацыя. Для мяне ён ва ўсіх сэнсах самы важны і самы значны за 25 гадоў работы ў якасці дырыжора сімфанічнага аркестра Брэсцкага акадэмічнага тэатра драмы. А публіка пачуе, якое ў нас нацыянальнае музычнае багацце ў краіне", - рэзюмаваў Аляксандр Сасноўскі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі