15 студзеня, Віцебск /Вольга Багачова - БЕЛТА/. Выстава паштовых марак КНДР адкрываецца сёння ў Віцебску, паведамілі карэспандэнту БЕЛТА ў Музеі гісторыі прыватнага калекцыянавання, дзе экспазіцыя будзе прадстаўлена.
Выстава, арганізаваная пры падтрымцы пасольства КНДР у Беларусі, знаёміць наведвальнікаў з усім багаццем марак, выпушчаных у гэтай краіне на працягу 50 апошніх гадоў. Экспазіцыя, якая ўключае каля 800 марак, адлюстроўвае ўсе бакі жыцця карэйцаў. На марках багата прадстаўлена гістарычная і патрыятычная тэматыка, многія з іх прысвечаны Кім Ір Сену, заснавальніку паўночнакарэйскай дзяржавы, і яго паслядоўнікам - Кім Чэн Іру і Кім Чэн Ыну. Ёсць маркі, прысвечаныя нацыянальным традыцыям і звычаям. Экспанаты дадуць магчымасць таксама прасачыць сусветную тэндэнцыю развіцця паштовых марак. Тут і гарадскія пейзажы, і вядомыя людзі, шырока прадстаўлены тэмы транспарту, алімпійскіх відаў спорту, асваення космасу. Асаблівае месца займаюць маркі з адлюстраваннем флоры і фаўны. Травы, кветкі і дрэвы выступаюць не толькі як жывыя фарбы для стварэння ідэальнай карціны прыроды ў яе сезонных зменах, але і як адлюстраванне традыцыйнай вобразнасці, прымхаў і павер'яў, якія стагоддзямі існавалі ў Карэі.
"Самі карэйцы вельмі любяць адпраўляць і атрымліваць пісьмы. Падстаў скарыстацца поштай і адправіць паштоўку сябрам шмат: у Карэі прынята віншаваць адзін аднаго паштоўкай у сувязі з рознымі жыццёвымі падзеямі. Акрамя таго, у гэтай краіне існуе яшчэ адна добрая традыцыя: помніць і віншаваць паштоўкай сваіх настаўнікаў. Такім чынам, паштовыя маркі адлюстроўваюць пэўны стыль жыцця, азнаёміцца з якім будзе надзвычай цікава", - расказалі ў музеі.
Першыя паштовыя маркі КНДР - "Мугунхва" (кветка гібіскусу) і "Скалы Самсон" - былі выпушчаны ў 1946 годзе ў гонар пачатку паштовай гаспадаркі ў вызваленай Карэі. З таго часу яны не проста адыгрываюць ролю сведчання аплаты за паштовую службу, а падкрэсліваюць сваю значнасць як сродак, які пашырае веды людзей пра краіну і свет у цэлым. У 1965 годзе КНДР была ўключана ў спіс членаў Міжнароднай федэрацыі філатэлістаў (FIP), з 1974 года ўваходзіць у Сусветны паштовы саюз. У гэтыя гады пачынаецца выпуск марак на міжнародныя тэмы з надпісамі на англійскай мове для філатэлістаў-калекцыянераў. Многія паштовыя маркі КНДР з'яўляюцца рэдкімі і вельмі каштоўнымі філатэлістычнымі экзэмплярамі.-0-
