3 лістапада, Мінск /Кар. БЕЛТА/. Адкрыццё XXVIII Мінскага міжнароднага кінафестывалю "Лістапад" будзе адлюстроўваць слоган гэтага фестывалю - "Сапраўдныя каштоўнасці", паведаміла карэспандэнту БЕЛТА рэжысёр цырымоній адкрыцця і закрыцця Уладзіслава Арцюкоўкая.
Традыцыйна беларускія кіназоркі, а таксама ўсе замежныя госці, якія прыедуць на фестываль, пройдуць па чырвонай дарожцы. Чакаецца прыезд вялікіх дэлегацый з розных краін. Вядучы цырымоніі чырвонай дарожкі - дырэктар кінафестывалю Уладзімір Карачэўскі.
На самім адкрыцці будзе ўручаны прыз Прэзідэнта. У гэтым годзе яго атрымае вядомы беларускі кінарэжысёр, імя якога пакуль трымаюць у сакрэце.
"Слоган кінафестывалю ў гэтым годзе - "Сапраўдныя каштоўнасці", таму ўвесь сцэнарый цырымоніі адкрыцця прысвечаны гэтай прыгожай тэме ў кіно", - адзначыла Уладзіслава Арцюкоўская.
Паводле яе слоў, цырымонію адкрые незвычайны пралог. "Гэта сінтэз сучаснага і нацыянальнага каларыту: на сцэне адначасова будуць і жалейкі, і дыджэі. Будзе выканана песня праекта "Зямля і неба". А суправаджаюць гэта прыгожае адкрыццё дзяўчаты ў залатых сукенках. На закрыцці "Лістапада", дарэчы, упершыню можна будзе пачуць новую песню легендарнага ансамбля "Песняры" "Золата "Лістапада", напісаную спецыяльна да гэтага кінафестывалю", - расказала рэжысёр.
На цырымоніі адкрыцця прагучаць цікавыя вакальныя нумары. У прыватнасці, завяршацца яна будзе ўрыўкам з "Травіяты". Тэльман Гужэўскі, член журы конкурсу асноўнага кіно, які прыехаў з Ізраіля, паўдзельнічае ў гэтым нумары разам з салістамі Вялікага тэатра - Мартай Данусевіч і Дзмітрыем Шабецем. Будуць прадстаўлены вельмі прыгожы інструментальны нумар у выкананні скрыпачкі Ганны Церан - адажыа з "Маленькага прынца" Яўгена Глебава, а таксама песня з кінафільма "Ціхія троечнікі" ў выкананні легендарнага ансамбля "Верасы".
Вядома, адбудзецца і традыцыйнае разбіванне талеркі.
XXVIII Мінскі міжнародны кінафестываль "Лістапад" пройдзе ў сталіцы і рэгіёнах з 4 па 11 лістапада. У Мінску паказы адбудуцца ў пяці кінатэатрах: "Масква", "Беларусь", "Дом кіно", "Піянер", "Цэнтральны".
Урачыстая цырымонія адкрыцця фестывалю па шматгадовай традыцыі адбудзецца ў сталічным кінатэатры "Масква" 4 лістапада.-0-
