26 ліпеня, Мінск /Кар. БЕЛТА/. Якія міні-кнігі Беларусі перададуць у дар Новай Александрыйскай бібліятэцы, расказала карэспандэнту БЕЛТА старшыня Беларускага прафсаюза работнікаў культуры, інфармацыі, спорту і турызму Таццяна Філімонава.
Паводле яе слоў, міні-копіі кніг ужо выраблены і гатовы да перадачы ў дар Новай Александрыйскай бібліятэцы. Гэта 12 рэдкіх кніг, сярод якіх творы Якуба Коласа, Янкі Купалы, Максіма Багдановіча, Францыска Скарыны, Статут ВКЛ. У калекцыі ёсць і арабаграфічныя рукапісы ў Беларусі, беларускія старадрукаваныя выданні, кітабы - рукапісныя кнігі беларускіх мусульман, старадаўнія беларускія рукапісы, аўтографы знакамітых тварцоў.
Падчас нядаўняй сустрэчы беларускай дэлегацыі з кіраўніцтвам Новай Александрыйскай бібліятэкі была агаворана дата перадачы ў дар калекцыі рэдкіх кніг Беларусі егіпецкаму боку і афіцыйнай цырымоніі адкрыцця экспазіцыі. Як мяркуецца, гэта адбудзецца ў кастрычніку бягучага года.
Таццяна Філімонава адзначыла, што такое гуманітарнае супрацоўніцтва вельмі важна, паколькі дае магчымасць вялікай колькасці турыстаў з розных краін, якія наведваюць Новую Александрыйскую бібліятэку, даведацца пра багатую культуру Беларусі.
Ідэю прапрацоўкі пытання вырабу і перадачы ў дар Новай Александрыйскай бібліятэцы міні-копій рэдкіх кніг Беларусі, якія захоўваюцца ў Нацыянальнай бібліятэцы Беларусі, выказаў старшыня ФПБ Міхаіл Орда падчас экскурсіі па бібліятэцы ў Александрыі, якая адбылася ў кастрычніку 2021 года. Тады ў гэтым горадзе праходзіў беларуска-егіпецкі форум. На той момант у Новай Александрыйскай бібліятэкі ўжо была ў экспазіцыі перададзеная ў дар калекцыя кніг Расіі, што і паслужыла прыкладам для далейшага гуманітарнага супрацоўніцтва.-0-
