21 лютага, Мінск /Кар. БЕЛТА/. У Дзяржаўным літаратурным музеі Янкі Купалы 22 лютага адкрыецца сумесная выстава музея і Нацыянальнай бібліятэкі Беларусі "Ураджай друкаванага слова", паведамілі БЕЛТА ў музеі.
З самага пачатку свайго творчага шляху Янка Купала падкрэсліваў неабходнасць адукацыі і высока цаніў веды як неабходную аснову для пабудовы новага, справядлівага ладу жыцця. Кніга была яго сябрам і спадарожнікам з дзяцінства. Гэта тое, чаго ён жадаў кожнаму беларусу.
Паэт шчыра вітаў адраджэнне і распаўсюджванне беларускага друкаванага слова. Сам ён быў непасрэдным удзельнікам станаўлення беларускага перыядычнага і кніжнага друку. У пачатку 1920-х Янка Купала выкарыстоўваў свой вопыт рэдактара на пасадзе загадчыка літаратурна-мастацкай секцыі літаратурна-навуковага аддзела Народнага камісарыята асветы, дзе займаўся выдавецкай дзейнасцю. 100 гадоў таму, у першым нумары часопіса "Полымя", ён апублікаваў артыкул "Выдавецкая справа ў Савецкай Беларусі за 1922 год" - агляд беларускай паліграфіі за год, які Купала назваў "самым ураджайным годам у справе росквіту беларускага друкаванага слова".
Выставачны праект, у якім задзейнічана больш за 100 экспанатаў з калекцый музея Песняра і галоўнага беларускага кнігасховішча, дае магчымасць пазнаёміцца непасрэдна з кнігамі, з'яўленне якіх класік так шчыра вітаў у пачатку 1923 года. Гэтыя сціплыя томікі не вылучаюцца ідэальнай графікай і якаснай паперай, але кожны з іх з'яўляецца крыніцай той магутнай плыні, якую ўяўляюць сабой сёння беларускія друкаваныя кнігі.
Выстава будзе экспанавацца да 1 красавіка.-0-
