21 лістапада, Мінск /Кар. БЕЛТА/. У Палацы Рэспублікі 25 лістапада пройдзе святочны паказ, прысвечаны 25-годдзю ўстановы. Аб гэтым на прэс-канферэнцыі паведаміў дырэктар Палаца Рэспублікі Максім Прыхадоўскі, перадае карэспандэнт БЕЛТА.
"Гэта для нас вельмі прыемная нагода - 25-годдзе Палаца Рэспублікі і 20-годдзе Заслужанага калектыву Рэспублікі Беларусь Прэзідэнцкага аркестра Рэспублікі Беларусь. Самі юбілейныя даты былі раней, але мы вырашылі дабавіць сюды крыху сімвалізму і адзначыць 25 лістапада 25 гадоў. Святкаванне будзе даволі яркім. Мы пастараемся паказаць нашу душу з дапамогай не толькі тэхнічных магчымасцей, але і таго дзейства, якое разгорнецца на сцэне. Гэта двухгадзінны паказ з удзелам зорак, маладых выканаўцаў", - расказаў Максім Прыхадоўскі.
Спіс гасцей свята вялікі. "Каго мы запрашалі на юбілей? Вядома ж, у зале будуць прысутнічаць калектыў Палаца Рэспублікі і члены сем'яў супрацоўнікаў (а гэта каля 800 чалавек), дыпламатычны корпус. Мне вельмі прыемна, што паслы розных краін адгукнуліся на гэта запрашэнне. Таксама запрошаны вышэйшыя службовыя асобы, міністры, лепшыя студэнты ўніверсітэтаў, кіраўнікі самых буйных тэатральных і канцэртных пляцовак, - прадоўжыў дырэктар Палаца Рэспублікі. - Вельмі прыемна, што на запрашэнні адгукнуліся нашы расійскія калегі, з якімі мы рабілі сольныя праграмы Прэзідэнцкага аркестра, нас звязваюць вельмі цёплыя сяброўскія адносіны. Мы пастараліся запрасіць усіх тых, з кім нас звязвала штодзённае жыццё на працягу гэтых 25 гадоў".
"Вельмі прыемна, што ўсе адгукаюцца. А мы ў сваю чаргу з хваляваннем рыхтуемся да свята", - дадаў Максім Прыхадоўскі.-0-
