Інклюзіўны паказ створаных дзецьмі калекцый адзення прайшоў на "Славянскім базары ў Віцебску"

12 ліпеня, Віцебск /Алеся Пушнякова - БЕЛТА/. Калекцыі адзення, створаныя дызайнерамі і дзецьмі з асаблівасцямі развіцця, прадставілі ў рамках "Славянскага базару ў Віцебску" на інклюзіўным модным паказе "Рука ў руцэ", перадае карэспандэнт БЕЛТА.

На подыум у міжнародным прэс-цэнтры ў Канцэртнай зале "Віцебск" выйшлі мадэлі і дызайнеры ў адной асобе. Гэта выхаванцы Віцебскай, Каменскай (Магілёўская вобласць) і Рудзенскай (Мінская вобласць) спецыяльных школ-інтэрнатаў, а таксама юныя мадэлі ўзорнага тэатра моды "Касцюмер" Цэнтра культуры "Віцебск" і маскоўскага дома моды "Сонечны анёл". Дзяўчынкі і хлопчыкі паказалі калекцыю для падлеткаў і стыльных дарослых дам, яркія паўсядзённыя і ўборы для выхаду. Любая дзяўчынка хоць раз у жыцці марыла прымераць на сябе вобраз прынцэсы, а ва ўдзельніц моднага паказу гэта якраз атрымалася - цэлая калекцыя пад адпаведнай назвай пакарыла гледачоў. Нікога не пакінула абыякавым маленькая сукенка з плюшавых мішак.

Кіраўнік маскоўскага сямейнага дома моды "Сонечны анёл" і шматдзетная прыёмная маці Марына Маркелава расказала, што ў яе пад апекай 32 дзіцяці. "Мае дочкі самі шылі адзенне, займаліся стварэннем аксесуараў. Перад дэбютным паказам, які прайшоў вясной, яны ўсе начамі сядзелі за швейнай машынкай, гадзінамі прыклейвалі ланцужкі і іншыя ўпрыгажэнні да галаўных убораў. Вы не ўяўляеце, якая гэта для іх радасць. У дзяцей гараць вочы, яны мяняюцца на вачах. Маторыка рук пры рабоце з дэталямі дапамагае ім развівацца і фізічна. Мы вельмі рады, што выйшлі на міжнародны ўзровень са сваімі калекцыямі. Сацыякультурная інтэграцыя для асаблівых дзяцей важна, дзякуй, што арганізатары фестывалю адгукнуліся на такі праект", - падзялілася эмоцыямі яна.