Сцяг Чацвер, 28 сакавіка 2024
Усе навіны
Усе навіны
Культура
28 студзеня 2020, 17:41

Гулегіна: лічу Беларусь сваім родным домам

28 студзеня, Мінск /Кар. БЕЛТА/. Оперная спявачка Марыя Гулегіна прызналася журналістам, што лічыць Беларусь сваім родным домам, перадае карэспандэнт БЕЛТА.

1 лютага на сцэне Нацыянальнага акадэмічнага Вялікага тэатра оперы і балета Беларусі адбудзецца сольны канцэрт Марыі Гулегінай. Менавіта тут пачалася яе прафесійная кар'ера. "Я нарадзілася ў Адэсе, але Беларусь для мяне - родны дом. Гэта мая стартавая пляцоўка, узлётная паласа, - сказала спявачка. - Я хачу сюды вяртацца, каб прадэманстраваць усё сваё майстэрства, набытае за гэты час".

Паводле слоў спявачкі, беларуская сталіца сустрэла яе даволі цёпла. "Мінск - прыгожы еўрапейскі горад. Тут ідэальны парадак. У мяне шмат любімых мясцін. Мы з маёй дачкой учора з вялікім задавальненнем зноў адчулі любімы водар "Нарачанскага" хлеба. Дарэчы, у мяне па мацярынскай лініі ёсць беларускія карані. Таму тут я дома", - адзначыла спявачка.

У опернай дзівы даволі шчыльны графік. Дома (у Люксембургу) паміж гастролямі ёй удаецца бываць не больш за адзін - два дні. Свет яе захапленняў - сям'я і музыка. "Я заўсёды спяваю толькі тое, што лягло на душу. Я ўвесь час думаю аб тым, як і што магла б спець. Думкі аб рабоце заўсёды ў маёй галаве", - прызналася яна.

Сваю старэйшую дачку яна нарадзіла вельмі рана - у 19 гадоў. У 23 гады стала выступаць на сцэне Вялікага тэатра Беларусі. Замест калыханак дачцэ, а потым сыну Марыя Гулегіна выконвала арыі з опер. А яшчэ яна добрая грыбніца. "Часам мне ўдаецца сабраць да 60-80 кг грыбоў. І гэта толькі баравікі", - расказала спявачка.

У сольным канцэрце на сцэне Вялікага тэатра Беларусі Марыя Гулегіна прадставіць праграму з оперных арый італьянскіх кампазітараў. У першым аддзяленні прагучыць толькі музыка Джузэпэ Вердзі, у другім - спявачка выканае арыі з опер Джакама Пучыні і кампазітараў-верыстаў. За дырыжорскім пультам у гэты вечар будзе італьянскі дырыжор Альберта Веранезі. "Я ўжо шмат гадоў супрацоўнічаю з Марыяй. З ёй добра працаваць. Яна выдатна адчувае ўсю глыбіню тэксту оперы", - сказаў дырыжор.

Дарэчы, оперная дзіва валодае многімі мовамі. У іх ліку - англійская, нямецкая, італьянская, цяпер яна асвойвае французскую.

У рэпертуары спявачкі - галоўныя партыі ў операх "Аіда", "Манон Леско", "Норма", "Федора", "Турандот", "Адрыена Лекуўрэр", партыі Абігайль у "Набука", Лэдзі Макбет у "Макбеце", Віялеты ў "Травіяце", Леаноры ў "Трубадуры" і "Сіле лёсу", Эльвіры ў "Эрнані", Лізаветы ў "Дон Карласе" і многія іншыя. Яе партнёрамі па сцэне былі Лучана Павароці, Пласіда Дамінга, Леа Нучы, Рэната Брусон, Хасэ Кура і Сэмюэль Рэймі. Яна ўдзельнічала ў пастаноўках пад кіраўніцтвам маэстра Рыкарда Муці і Джанандрэа Гавацэні, Джэймса Лівайна і Клаўдзіа Абада, Валерыя Гергіева і Фабіа Луізі.

Марыя Гулегіна - лаўрэат шматлікіх прэмій і ўзнагарод, уключаючы прэмію за дэбют на сцэне Арэна дзі Верона, прэмію імя В. Беліні, прэмію горада Мілан "За развіццё опернага мастацтва ў свеце". Спявачка таксама ўдастоена залатога медаля Марыі Дзамбоні і залатога медаля фестывалю ў Осацы. Марыя Гулегіна з'яўляецца ганаровым членам Міжнароднага паралімпійскага камітэта і паслом добрай волі ЮНІСЕФ.-0-

Падпісвайцеся на нас у
Twitter
Топ-навіны
Свежыя навіны Беларусі