ДЗЯРЖОРГАНЫДЗЯРЖОРГАНЫ
Флаг Нядзеля, 19 верасня 2021
Мінск Пераменная воблачнасць +6°C
Усе навіны
Усе навіны
Культура
24 мая 2021, 16:42

Гран-пры форуму "Папараць-кветка БДУ" заваяваў народны хор "Белая вежа"

Фота з архіва
Фота з архіва

24 мая, Мінск /Кар. БЕЛТА/. Гран-пры XV Міжнароднага форуму студэнцкіх хароў "Папараць-кветка БДУ" заваяваў народны акадэмічны хор "Белая вежа" Брэсцкага дзяржаўнага тэхнічнага ўніверсітэта. Яго кіраўніком выступае Ірына Ангалюк. Аб гэтым БЕЛТА паведамілі ў прэс-службе ВНУ.

Акрамя таго, калектыў атрымаў высокую ўзнагароду "За лепшае выкананне духоўнай праграмы", а яго канцэртмайстар Кацярына Мядзведзева - спецыяльны дыплом у намінацыі "Лепшы канцэртмайстар".

Студэнцкі хор Cantus Juventae Мінскага дзяржаўнага лінгвістычнага ўніверсітэта адзначаны за "Лепшае выкананне свецкай праграмы". Кіраўнік калектыву Аляксей Клімовіч заваяваў дыплом у намінацыі "Лепшы дырыжор".

Лепшым салістам прызнаны вакаліст інтэрнацыянальнага студэнцкага хору "Дамінанта" Беларускага дзяржаўнага медыцынскага ўніверсітэта Карут Камаль. Калектыў таксама ўдастоены спецыяльнага дыплома "За арыгінальнае выканальніцкае рашэнне свецкай праграмы".

"Лепшым творам форуму названа "Ночка луговая", напісаная Георгіем Дзехцяровым на словы паэта-песенніка Антона Прышэльца. Музычная кампазіцыя прагучала ў выкананні народнай харавой капэлы "Дзянніца" Гомельскага дзяржаўнага ўніверсітэта імя Ф.Скарыны. Акрамя таго, калектыў атрымаў узнагароду "За захаванне традыцый студэнцкай харавой творчасці".

Спецыяльнымі дыпломамі "За лепшае выкананне твора, прысвечанага Вялікай Перамозе", а таксама "За стылістычнае багацце прадстаўленага рэпертуару" ўзнагароджана народная капэла Беларускага нацыянальнага тэхнічнага ўніверсітэта.

Сваю творчасць калектывы дэманстравалі ў рамках двух конкурсных этапаў. Артысты прадстаўлялі духоўную і свецкую праграмы. Маштабная падзея праходзіла з 20 па 22 мая ў Мінску. Удзельнікамі форуму сталі больш за 200 артыстаў сямі маладзёжных хароў з Мінска, Гомеля, Віцебска і Брэста.

Арганізатарам мерапрыемства выступіла ўпраўленне па справах культуры БДУ.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі