25 лістапада, Мінск /Кар. БЕЛТА/. На пазаконкурснай праграме Мінскага міжнароднага кінафестывалю "Лістапад" у кінатэатры "Масква" паказалі дакументальны фільм "Qazaq. Гісторыя залатога чалавека" рэжысёра Олівера Стоўна пра першага прэзідэнта Казахстана Нурсултана Назарбаева, перадае карэспандэнт БЕЛТА.
"Калі пачынаеш рабіць карціну, не ведаеш, як усё атрымаецца, і справа не ў бюджэце, кастынгу або тэме. Справа ў тым, што кіно - гэта магія, якая можа скласціся або не скласціся. Лічу, што карціна ўдалася, і пакуль што гэта мая лепшая работа, - сказаў сурэжысёр фільма Ігар Лапацёнак.- Ведаеце, мы намацалі нейкі трэнд, які склаўся на тэрыторыі рэспублік былога Савецкага Саюза. Ёсць такі стары выраз: "Час раскідваць і збіраць каменне". Мне здаецца, што настаў час збіраць каменне. Збіраць тыя супольнасці, якія былі раздзелены. І, са свайго боку, у здымках дакументальнага кіно мы бачым пэўную місію".
Выканаўчым прадзюсарам карціны і інтэрв'юерам стаў Олівер Стоўн - уладальнік трох прэмій "Оскар". Першы прэзідэнт Казахстана падзяліўся з ім успамінамі пра дзяцінства, сталенне, распад Савецкага Саюза і першыя гады незалежнасці рэспублікі.
"Да гэтага я не быў знаёмы з Нурсултанам Абішавічам. Мы стараліся здымаць так, каб першае знаёмства было адразу запісана, таму што гэтыя ўражанні самыя яркія. У нас нават не было дубляў, - дапоўніў Ігар Лапацёнак. - У размове Назарбаеў быў адкрытым, наколькі гэта магчыма, бо гэта чалавек, пасвячоны ў мноства тайнаў. У інтэрв'ю стараліся пазбягаць нейкіх жоўтых пытанняў, але падняцца туды, адкуль усё гэта відаць, нам удалося. У яго вялікі дар і ўменне заваёўваць давер, я такога не сустракаў ніколі. Гэта ўнікальная якасць. Аб усім астатнім - на экране, паколькі гэта трэба паглядзець".
"Дадам, што Нурсултан Абішавіч валодае велізарнай станоўчай энергетыкай. Калі ты знаходзішся побач з ім, то адчуваеш яе і проста атрымліваеш асалоду. Ён стараўся, стараецца і будзе старацца рабіць для сваёй краіны як мага больш добрага і хоча, каб тыя людзі, якія прыйшлі на змену, зрабілі яшчэ лепш", - дадаў прадзюсар фільма Ігар Кобзеў.
На пытанне пра далейшыя планы Ігар Лапацёнак адказаў: "Напалову я беларус (па матчынай лініі), таму для мяне гэта зямля родная. Я ўпэўнены, што мы што-небудзь добрае зробім у Беларусі".
Магчымы і тэатральныя паказы фільма. Творчая група дадала, што "Qazaq. Гісторыя залатога чалавека" ўключаны ў гонку за прэміяй "Оскар" і ўжо атрымаў першую музычную намінацыю. Музыку да фільма напісаў вядомы італьянскі кампазітар і дырыжор Карла Сіліёта. У запісе прынялі ўдзел музыканты сімфанічнага аркестра "Астана Опера" і казахстанскія выканаўцы фальклорнай музыкі. Паводле слоў Ігара Лапацёнка, гэтыя фільмы здымаюцца не для атрымання ўзнагарод, а для гледачоў, ацэнка якіх самая важная.
Еўрапейская прэм'ера фільма адбылася 20 кастрычніка на Рымскім кінафестывалі. "Лістапад" стаў трэцім форумам, гледачы якога глядзяць карціну на вялікім экране. Паказ карціны "Qazaq. Гісторыя залатога чалавека" арганізаваны дзякуючы падтрымцы пасольства Рэспублікі Казахстан у Беларусі. Пасля прэм'еры ў Мінску фільм убачаць у Аб'яднаных Арабскіх Эміратах, Узбекістане, Францыі, Германіі, Кітаі і Японіі. Плануецца, што пасля заканчэння сусветнага туру 8-серыйную версію кінастужкі пакажуць на тэлеэкране.-0-
