21 снежня, Мінск /Кар. БЕЛТА/. Канцэрт навучэнцаў "Віват, лаўрэаты!" да 85-годдзя Рэспубліканскай гімназіі-каледжа пры Беларускай дзяржаўнай акадэміі музыкі адбудзецца 24 снежня, паведамілі БЕЛТА арганізатары.
"Гімназія-каледж на працягу многіх дзесяцігоддзяў мэтанакіравана і плённа працуе над прафесійнай падрыхтоўкай юных таленавітых музыкантаў. У сценах гімназіі выхаваны звыш 2 тыс. лаўрэатаў прэстыжных рэспубліканскіх міжнародных конкурсаў, 590 навучэнцаў атрымалі заахвочванні спецыяльнага фонду Прэзідэнта Беларусі па падтрымцы таленавітай моладзі. Канцэртныя праграмы з удзелам нашых навучэнцаў можна пачуць сёння на лепшых канцэртных пляцоўках Мінска і краіны", - сказаў дырэктар гімназіі каледжа Аляксандр Палякоў.
Мерапрыемства адбудзецца ў канцэртнай зале гістарычнай часткі вучэбнага корпуса гімназіі-каледжа пасля рэканструкцыі з элементамі рэстаўрацыі, якая была выканана па распараджэнні Прэзідэнта Беларусі Аляксандра Лукашэнкі.
Выпускнікі каледжа падтрымліваюць высокі статус і міжнародны аўтарытэт сваёй alma mater, плённа працуюць у Беларусі і іншых краінах. Сярод іх - салісты Беларускай дзяржаўнай і расійскіх філармоній, вядучыя майстры Нацыянальнага акадэмічнага Вялікага тэатра оперы і балета, салісты аркестраў і творчых калектываў сусветнага ўзроўню, прафесары, дацэнты, выкладчыкі розных навучальных устаноў Беларусі, Расіі, дактары і кандыдаты навук, вядучыя супрацоўнікі Міністэрства культуры, кіраўнікі мастацкіх калектываў і ўстаноў усіх рангаў, музычныя крытыкі.-0-
