ДЗЯРЖОРГАНЫДЗЯРЖОРГАНЫ
Флаг Чацвер, 29 ліпеня 2021
Мінск Пераменная воблачнасць +26°C
Усе навіны
Усе навіны
Культура
17 чэрвеня 2021, 11:00

Гід па гісторыі і культуры Беларусі прадставілі ў Мінску

Фота з архіва
Фота з архіва

17 чэрвеня, Мінск /Кар. БЕЛТА/. Выстаўка "Беларусь і беларусы. Гід па гісторыі і культуры" адкрылася 16 чэрвеня ў Нацыянальным гістарычным музеі, перадае карэспандэнт БЕЛТА.

Выставачны праект расказвае аб асноўных этапах гістарычнага развіцця Беларусі. Ён дае кароткую характарыстыку культурных каштоўнасцей, прадстаўляе беларускую нацыю як неад'емную частку сусветнай супольнасці, дапамагае зразумець, што такое Беларусь і хто такія беларусы. Экспазіцыя прапануе адправіцца ў захапляльнае падарожжа, успомніць важныя даты, натхніцца спадчынай, а праз інтэрактыўныя элементы літаральна далучыцца да гісторыі.

"Вельмі важна, што ў Год народнага адзінства адкрываецца такая выстаўка, якая паказвае глыбіню нашых каранёў. Наш народ, які ўключае ў сябе дзясяткі розных нацыянальнасцей, мае права ганарыцца тысячагадовай гісторыяй нашай незалежнай, суверэннай Беларусі. Кожны стэнд, які можна ўбачыць у экспазіцыі, - элемент гісторыі беларускай дзяржаўнасці. Кожны прадмет, прадстаўлены тут, ілюструе мінулае і дае магчымасць на практыцы ўсвядоміць, наколькі прыгожая матэрыяльная і духоўная культура нашых продкаў", - адзначыў дырэктар Інстытута гісторыі НАН Беларусі Вадзім Лакіза.

Экспазіцыя складаецца з дзвюх частак: "Гісторыя" і "Культура". "Ідэя выстаўкі з'явілася яшчэ ў 2015 годзе, экспазіцыя задумвалася для паказаў за мяжой. З 2020 года для нас было важна існуючыя візуальныя матэрыялы, напрацоўкі дапоўніць матэрыяльнымі артэфактамі, каб завяршыць выставачны праект да гэтага лета. У экспазіцыі гісторыя падзелена на восем перыядаў: ад пачатку засялення тэрыторыі Беларусі да сучаснасці. Што датычыцца культурных тэм, мы пастараліся ахапіць найбольш цікавыя для шырокай аўдыторыі моманты: нацыянальны строй, беларуская кухня, мова, музыка. І, вядома, прырода, з якой пачынаюцца і гісторыя, і культура", - расказала куратар праекта вядучы навуковы супрацоўнік экспазіцыйнага аддзела музея Таццяна Мірановіч.

Праект "Беларусь і беларусы. Гід па гісторыі і культуры" рэалізуецца ў адпаведнасці з грантам Прэзідэнта Рэспублікі Беларусь на 2021 год у сферы культуры. Партнёрамі выступаюць Інстытут гісторыі НАН, Нацыянальны архіў, Нацыянальны гістарычны архіў, Беларускае тэлеграфнае агенцтва, Дэпартамент па ліквідацыі наступстваў катастрофы на Чарнобыльскай АЭС, Нацыянальны мастацкі музей, музеі пажарнай і аварыйна-выратавальнай справы, прыроды і экалогіі, гісторыі тэатральнай і музычнай культуры. Фатографы - Ганна Кіпель і Анатоль Андрэеў.

Наведаць выставачны праект можна да канца гэтага года.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі