10 лістапада, Мінск /Кар. БЕЛТА/. Міжнародны выставачны праект "Благодаря божественному Пушкину. Как создавался роман Анна Каренина" адкрыўся сёння ў Дзяржаўным музеі гісторыі беларускай літаратуры, перадае карэспандэнт БЕЛТА.
Першы сакратар пасольства Расіі ў Беларусі Юлія Араева адзначыла на адкрыцці, што музей гісторыі беларускай літаратуры - адзін з самых утульных і душэўных музеяў Мінска. "Ужо не першы раз ён арганізуе такія выдатныя мерапрыемствы сумесна з расійскімі ўстановамі культуры. Гэта каштоўна, і я хачу падзякаваць вам за гэту падзвіжніцкую дзейнасць", - сказала яна.
"Ужо амаль 150 гадоў раман "Ганна Карэніна" з'яўляецца адным з самых папулярных і чытаемых твораў Льва Талстога ва ўсім свеце, - адзначыла загадчыца навукова-экспазіцыйнага аддзела музея гісторыі беларускай літаратуры Вольга Гулева. - Прадстаўленая экспазіцыя раскажа вам гісторыю аб тым, як ствараўся раман. Тут нават ёсць чарнавыя рукапісы самога Льва Мікалаевіча, якія дазваляюць прасачыць ход напісання твора: розныя варыянты сюжэту, пошук вобразаў герояў пісьменнікам".
На выставе таксама размясцілі арыгінальныя прыжыццёвыя выданні рамана, пераклады твораў пісьменніка на беларускую мову, копіі ілюстрацый да кнігі і кадры яго розных экранізацый. Акрамя таго, можна ўбачыць эскізы дэкарацый і касцюмаў да пастановак "Ганны Карэнінай". Напрыклад, капялюш актрысы, якая сыграла галоўную ролю ў гэтым спектаклі на сцэне Беларускага дзяржаўнага тэатра імя Янкі Купалы ў 1951 годзе. Або афішы мастацкіх фільмаў з "савецкай" Ганнай Карэнінай - Таццянай Самойлавай і "замежнай" - Кірай Найтлі.
Пры падрыхтоўцы праекта спецыялісты вывучылі літаральна ўсё, што звязана з раманам класіка сусветнай літаратуры. Пачынаючы з першага імпульсу, які пісьменнік атрымаў ад Аляксандра Пушкіна, і заканчваючы праўкамі тэксту перад друкам. Сцэны з кнігі - гэта своеасаблівая панарама рускага жыцця другой паловы XIX стагоддзя. Раман "Ганна Карэніна" перакладзены практычна на ўсе мовы свету і кожны год выдаецца ў многіх краінах.
На адкрыцці прагучаў урывак з твора класіка сусветнай літаратуры ў выкананні дыктара Першага нацыянальнага канала Беларускага радыё Алега Вінярскага. Праект арганізаваны сумесна з Дзяржаўным музеем Л.М. Талстога ў Маскве.-0-
