ДЗЯРЖОРГАНЫДЗЯРЖОРГАНЫ
Панядзелак, 30 сакавіка 2020
Мінск Суцэльная воблачнасць 0°C
Усе навіны
Усе навіны
Культура
11 лютага 2020, 16:54

Фільм "Авантуры Пранціша Вырвіча" з'явіцца ў пракаце 19 сакавіка

Фота з архіва
Фота з архіва

11 лютага, Мінск /Кар. БЕЛТА/. Прэм'ера гістарычнага фільма "Авантуры Пранціша Вырвіча" вытворчасці Нацыянальнай кінастудыі "Беларусьфільм" адбудзецца 19 сакавіка, паведамілі БЕЛТА на кінастудыі.

Карціна знята паводле рамана беларускай пісьменніцы Людмілы Рублеўскай. "Беларусь. XVIII стагоддзе. Юны шляхціц Пранціш разам з доктарам, алхімікам Бутрамеем Лёднікам трапляе ў вір інтрыг уплывовых магнатаў вакол трона Рэчы Паспалітай і барацьбы за магутны артэфакт - рамфею ўлады. Герояў чакаюць адчайныя бітвы, пагоні, слаўныя подзвігі і, вядома, каханне", - расказалі на кінастудыі.

Здымкі фільма праходзілі ў самых знакавых гістарычных мясцінах Беларусі: Нясвіжскім, Мірскім і Лідскім замках, Бабруйску, Снове, Мінску. У павільёнах кінастудыі былі пабудаваны ўнікальныя дэкарацыі, якія акунаюць у атмасферу часу, калі панавала шляхта. Шыкоўныя касцюмы, з дзіўнай дакладнасцю адноўленыя беларускімі майстрамі, падкрэслілі прыгажосць і вытанчанасць XVIII стагоддзя. Спецыяльна для праекта на "Беларусьфільме" па чарцяжах Леанарда да Вінчы быў пабудаваны яго знакаміты танк.

Над фільмам працавала беларуская творчая група - рэжысёр Аляксандр Анісімаў, аўтар сцэнарыя Валянцін Залужны і аператар-пастаноўшчык Дзмітрый Рудзь. Галоўныя ролі выканалі: Георгій Пятрэнка, Іван Трус, Віктар Манаеў, Вераніка Пляшкевіч, Вячаслаў Паўлюць, Яўгенія Анікей, Дзмітрый Есяневіч, Сяргей Чакерас, Сяргей Жбанкоў. Трэйлер фільма даступны на афіцыйным YouTube-канале кінастудыі "Беларусьфільм".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі