29 красавіка, Віцебск /Вольга Багачова - БЕЛТА/. У Музеі гісторыі прыватнага калекцыяніравання ў Віцебску 30 красавіка адкрыецца выстаўка мініяцюр, прысвечаная маршалам Перамогі, паведамілі БЕЛТА ў музеі.
Выстаўка прымеркавана да 75-годдзя Перамогі ў Вялікай Айчыннай вайне. У экспазіцыі будзе прадстаўлена больш за 100 фігур ваенна-гістарычнай мініяцюры. Гэта маршалы ў параднай форме (Г.К. Жукаў, К.К. Ракасоўскі, Р.Я. Маліноўскі, І.Х. Баграмян, генералісімус І.В. Сталін і інш.), а таксама ўдзельнікі Першай і Другой сусветных войнаў розных краін свету ў ваеннай уніформе: Расійскай імперыі і СССР, Сербіі, Румыніі, Грэцыі, Вялікабрытаніі, Германіі, Японіі, Кітая, ЗША, Італіі і г.д.
Аўтарам мініяцюр з'яўляецца Ігар Гарбуноў - кандыдат мастацтвазнаўства, дацэнт кафедры дызайну мастацка-графічнага факультэта ВДУ імя П.М. Машэрава. Мастак-мініяцюрыст стварыў экспазіцыі амаль дзясятка музеяў у Беларусі і некалькіх у Калінінградскай вобласці Расіі. Стварэннем мініяцюрных фігурак воінаў розных часоў і родаў войскаў з мастацкай пластыкі ён займаецца ўжо больш за 30 гадоў.
"Ваенна-гістарычная мініяцюра - гэта сур'ёзны і цікавы від мастацтва, які патрабуе падрабязнага вывучэння гістарычных дакументаў, этнаграфіі краю і ювелірнага майстэрства пры стварэнні самой фігуры", - падкрэслілі ў музеі.
Над цяперашняй экспазіцыяй аўтар працаваў амаль паўгода. Праз знаёмства з мініяцюрамі можна прасачыць жыццёвы шлях маршалаў, дзякуючы дзеянням якіх былі нанесены вырашальныя паражэнні нямецка-фашысцкім войскам у час Вялікай Айчыннай вайны.
Наведаць выстаўку можна па 6 ліпеня.-0-
