12 мая, Мінск /Кар. БЕЛТА/. "Еўрабачанне-2020", адмененае з-за каранавіруса, адбудзецца ў выглядзе анлайн-канцэртаў. Яны будуць паказаны ў дні паўфіналаў 12 і 14 мая. А ў дзень фіналу, 16 мая, рыхтуецца спецыяльнае шоу, паведамляе нямецкая тэлерадыёкампанія Deutsche Welle.
Анлайн-канцэрты Eurovision Song Celebration ("Ушаноўванне песень "Еўрабачання") пройдуць замест паўфіналаў 12 і 14 мая, а шоу Europe Shine A Light ("Еўропа запальвае святло") - 16 мая, у дзень, калі павінен быў адбыцца фінал буйнейшага тэлевізійнага музычнага конкурсу ў свеце. Такое рашэнне яшчэ ў красавіку прынялі арганізатары - Еўрапейскі вяшчальны саюз і пул з трох тэлекампаній Нідэрландаў. З-за пандэміі каранавіруса конкурс "Еўрабачанне-2020" адмянілі, а ў будынку арэны ў Ратэрдаме размясцілі шпіталь для лячэння хворых на COVID-19.
12 мая, калі было запланавана правядзенне першага паўфіналу конкурсу, на афіцыйным канале "Еўрабачання" ў YouTube можна будзе ўбачыць першы канцэрт. Ён пачнецца ў 22.00 па маскоўскім часе. Відэа песень краін-удзельніц будуць паказаны ў тым парадку, у якім выканаўцы выйшлі б на сцэну канцэртна-спартыўнага комплексу Ahoy. Кліпы расійскай групы Little Big і беларускага дуэта Val будуць паказаны ў першай частцы двухгадзіннага канцэрта, а ўкраінскай групы Go_A - у другой.
Арганізатары абяцаюць не проста трансляцыю відэа песень удзельнікаў, але і розныя сюрпрызы. Акрамя таго, напярэдадні анлайн-канцэртаў Еўрапейскі вяшчальны саюз заклікаў паклоннікаў запісаць сваю версію песень удзельнікаў гэтага года. Фрагменты з прысланых фанатамі відэа будуць паказаны замест традыцыйнага для конкурсу паўтору ўрыўкаў выступленняў выканаўцаў. Пры гэтым, падкрэсліваюць арганізатары, галасавання гледачоў у час анлайн-трансляцыі не будзе.
Канцэрт Europe Shine A Light пройдзе ў Хілверсюме 16 мая. Яго будуць трансліраваць усе краіны - удзельніцы "Еўрабачання-2020". "Мы хочам не проста паказаць шоу і прадставіць 41 удзельніка, якіх мы чакалі ў Ратэрдаме, але і натхніць і аб'яднаць у гэты цяжкі час людзей у Еўропе і за яе межамі", - растлумачыў ідэю канцэрта яго выканаўчы прадзюсар Сітсэ Бакер. Ён заклікаў зрабіць шоу незабыўным момантам у гісторыі "Еўрабачання".
У гэтым дапамогуць не толькі пераможцы мінулых конкурсаў швед Монс Зелмерлёў, ізраільцянка Нета Барзілай, Марыя Шарыфавіч з Сербіі і пераможца мінулага года, галандзец Дункан Лорэнс. Удзельнікі цяперашняга "Еўрабачання" па тэлемосце выканаюць песню-пераможцу 1997 года Love Shine A Light, а фанаты - у адзіным віртуальным хоры What's another year. З ёю двухразовы пераможца конкурсу ірландзец Джоні Логан упершыню выйграў "Еўрабачанне" ў 1980 годзе.-0-
