19 снежня, Мінск /Кар. БЕЛТА/. Намеснік прэм'ер-міністра Ігар Петрышэнка ў эфіры тэлеканала АНТ раскрыў падрабязнасці нацыянальнага кінапраекта "Мы адзіныя", паведамляе БЕЛТА.
Нацыянальны кінапраект з рабочай назвай "Мы адзіныя" запушчаны ў вытворчасць у снежні 2021 года. Фільм прысвечаны аб'яднанню Беларусі ў 1920-1930-я гады. Поўнасцю гатовы фільм плануецца здаць у маі 2023 года. Гэтымі днямі ў час наведвання Нацыянальнай кінастудыі "Беларусьфільм" Ігару Петрышэнку былі паказаны некаторыя эпізоды ўжо знятага матэрыялу.
"Гэта кіно пра тое, як нялёгка было беларусам знайсці сваё шчасце. Падзеі, звязаныя з тым перыядам, калі частка Беларусі знаходзілася ў складзе польскай дзяржавы. І менавіта барацьба за ўз'яднанне, паколькі краіна была падзелена. Як людзі ажыццяўлялі гэтыя імкненні і дзеянні, каб сапраўды ўз'яднаць краіну ў адзінае цэлае", - адзначыў Ігар Петрышэнка.
Нацыянальны кінапраект нікога не пакіне абыякавым. "Цяпер актыўна рыхтуюцца ролікі. Самае галоўнае - ён павінен закрануць нашу моладзь", - падкрэсліў віцэ-прэм'ер.-0-
