23 лютага, Мінск /Кар. БЕЛТА/. Скульптура, якая выходзіць у архітэктурнае, прыроднае асяроддзе, - паказчык узроўню культуры грамадства. Аб гэтым заявіў старшыня секцыі скульптуры Беларускага саюза мастакоў Іван Арцімовіч на прэс-канферэнцыі "Скульптурнае аблічча Мінска: учора, сёння, заўтра", перадае карэспандэнт БЕЛТА.
"Сёння ўвечары мы адкрываем вельмі цікавы выставачны праект, які называецца "Скульптуры - гораду". У апошнія 10 гадоў мы правялі серыю такіх праектаў. Скульптура - гэта грамадскае мастацтва, яно павінна выходзіць у грамадскае асяроддзе, не замыкацца на прасторы творчых майстэрань, нейкіх прыватных галерэй і невялікіх выставачных залаў. Скульптура, якая выходзіць у архітэктурнае, прыроднае асяроддзе, - гэта паказчык узроўню культуры грамадства. І нашы праекты пастаянна вяртаюцца да пытання аб дыялогу мастака, улад, горада, архітэктараў. Мы заклікаем да гэтага дыялогу", - расказаў Іван Арцімовіч.
Ён адзначыў, што выстава створана на аснове матэрыялу, які ўжо некалі прадстаўляўся публіцы, але цяпер яна будзе дэманстравацца ў пашыраным варыянце. "Тое, што датычыцца нашых прапаноў, яны будуць акумуляваны ў цэнтры залы і будуць уяўляць сабой традыцыйную выставу скультуры. Усё, што можна будзе ўбачыць на выставе, будзе з прэтэнзіяй на нейкае асяроддзе, з прэтэнзіяй на павелічэнне і грамадскае гучанне. Большую долю ў экспазіцыі складуць не столькі нейкія сацыяльныя аб'екты, паколькі мы прывыклі да скульптуры ў выглядзе помніка, а менавіта аўтарскія скульптуры. Гэта значыць, глядач, які сёння трапіць на выставу, у першую чаргу ўбачыць аўтара з яго арыгінальным метадам, даволі своеасаблівым падыходам і колам тэм і ідэй, якія гэты канкрэтны аўтар можа сёння прапанаваць нашаму грамадству. Не хацелася б, каб вуліцы беларускіх гарадоў, у тым ліку сталіцы, былі выпусташанай, пустой прасторай. Мінск - гэта вялікі горад, гэта Левіяфан, які можа паглынуць практычна любы скульптурны аб'ём. Таму нам вельмі важна паспяваць за гэтым развіццём, за пашырэннем горада, каб нашы аб'екты, нашы прапановы своечасова траплялі ў асяроддзе і стваралі культурны код, напаўнялі прастору пэўным зместам", - падкрэсліў скульптар.
Першы намеснік старшыні Беларускага саюза мастакоў Наталля Шаранговіч праінфармавала аб тым, што на выставе будуць прадстаўлены розныя пакаленні мастакоў. "Гэта і вядомыя, нашы мэтры, заслужаныя дзеячы. Гэта і Уладзімір Слабодчыкаў, і Аляксандр Фінскі, і Генадзь Буралкін, і Іван Міско, якому ўчора, дарэчы, споўніўся 91 год. Прадстаўлена на выставе і наша сярэдняе пакаленне, якое цяпер сапраўды актыўна працуе над стварэннем як манументальных аб'ектаў, так і гарадской скульптуры. Прыемна, што ў праекце мы пакажам таксама і нашу моладзь. Хацелася б, каб гэта сувязь пакаленняў ніякім чынам не перарывалася. Дэманстравацца выстава будзе ў Палацы мастацтваў на працягу месяца. Мы хочам за час яе правядзення ініцыяваць нейкі дыялог, круглы стол, запрасіўшы туды не толькі мастакоў, якім ёсць што паказаць і прапанаваць - свае макеты, ідэі, канцэпцыі, але і прадстаўнікоў улады, тых, хто мог бы ацаніць усё прадстаўленае, для каго гэта было б цікава ў будучым", - канстатавала яна.-0-
