24 лістапада, Мінск /Кар. БЕЛТА/. Вечар памяці беларускага кінарэжысёра Віктара Турава, прысвечаны 85-годдзю з дня яго нараджэння, прайшоў 23 лістапада на палях XXVII Мінскага міжнароднага кінафестывалю "Лістапад" у Доме кіно, перадае карэспандэнт БЕЛТА.
"Віктар Тураў для мяне назаўсёды застаўся сонечным і мэтанакіраваным чалавекам. Аднойчы запрасіў мяне зняцца ў фільме "Высокая кроў", і мы тады з ім пасябравалі, - расказаў савецкі і расійскі акцёр, кінарэжысёр, пісьменнік, грамадскі дзеяч Мікалай Бурляеў. - Гэта класік. Цяпер такіх пранікнёных фільмаў з адчуваннем сваёй зямлі і каранёў не здымаюць. Нездарма стужка ўвайшла ў сотню лепшых фільмаў усіх народаў. Шчыра віншую з тым, што ў нашым жыцці і гісторыі ёсць такая асоба, як Віктар Тураў".
Савецкі і беларускі кінарэжысёр, сцэнарыст, аператар і заслужаны дзеяч мастацтваў БССР Дзмітрый Зайцаў прыгадаў майстра і адзначыў, што вельмі ўдзячны яму за тое, што шмат чаму ў яго навучыўся. "Без усмешкі я не магу ўспомніць яго, бо ён быў як цудоўным чалавекам, так і добрым спецыялістам. Думаю, што ў беларускім кіно такога рэжысёра больш не было і не будзе. Як ён адносіўся да людзей, як літаральна ўсіх любіў... Тураў быў верны сваёй традыцыі, а традыцыя яго была - вера, надзея і любоў. Ён быў унікальным чалавекам, таму што, нягледзячы на розныя жыццёвыя сітуацыі, ніколі не мог пакрыўдзіць чалавека", - адзначыў Дзмітрый Зайцаў.
Сын рэжысёра Арцём Тураў падзякаваў арганізатарам фестывалю за памятны вечар. "Дзякуй сябрам бацькі, вучням, якія захоўваюць гэту памяць, даюць магчымасць перадаваць яго ідэю і любоў да роднай зямлі з пакалення ў пакаленне. Прыемна тут знаходзіцца і яшчэ раз сказаць словы падзякі ўсім людзям, якія захавалі тую любоў, якую бацька дарыў гледачу і малой радзіме", - рэзюмаваў ён.
"Ёсць памяць, якую дзяржава нам дапамагае захоўваць: існуе вуліца імя Турава, адкрываюцца памятныя дошкі, у Магілёве штогод праводзяць цэлы кінатыдзень "Тураўская восень". Прыемна, што не перарываецца гэты ланцужок і юныя кінематаграфісты растуць і вучацца на гэтых фільмах", - сказала дачка Віктара Турава рэжысёр Алена Турава. Яна таксама нагадала, што на "Лістападзе" ёсць прыз імя Віктара Турава, які існуе шмат гадоў і будзе ўручаны ў бягучым годзе ў конкурсе "Кіно маладых".
У кінатэатры цяпер праходзіць паказ фільма Віктара Турава "Цераз могілкі".
Акрамя таго, у дні работы "Лістапада" ў Музеі гісторыі беларускага кіно працуе юбілейная выстава "Віктар Тураў. Дыханне жыцця". У кіназале Музея гісторыі беларускага кіно арганізаваны рэтраспектыўны паказ лепшых работ Віктара Турава, пастаўленых на кінастудыі "Беларусьфільм". 24 лістапада гледачы ўбачаць "Уваскрэсную ноч"(15.00) і "Пункт адліку" (18.30). Адзін фільм будзе дэманстравацца ў чацвер, 25 лістапада. Гэта кінакарціна "Гора баяцца - шчасця не бачыць" (15.00). Заключныя паказы пройдуць 26 лістапада: у 15.00 - "Чорны бусел", а ў 18.30 - "Шляхціц Завальня, або Беларусь у фантастычных апавяданнях".-0-
