8 лютага, Гомель /Кар. БЕЛТА/. Выстаўка "Дыялогі: традыцыйны кітайскі жывапіс і сучасная фэшн-фатаграфія" адкрылася ў Гомелі ў карціннай галерэі Г.Х.Вашчанкі, паведамілі БЕЛТА ў дзяржаўнай установе.
"Гэты праект, які рэалізуецца сумесна з Беларускай дзяржаўнай акадэміяй мастацтваў, раскрывае творчасць двух прадстаўнікоў кітайскага выяўленчага мастацтва - мастака Чжана Сінкэ, які ўжо адбыўся і атрымаў вядомасць, і маладога, амбіцыйнага і мэтанакіраванага фатографа У Цзівэя", - расказалі ў галерэі.
Блок "Хуа Чжан" прадстаўляюць творы Чжана Сінкэ, выкананыя ў тэхніцы традыцыйнага кітайскага жывапісу - гохуа. Свае работы аўтар ствараў, натхняючыся родным горадам Лаянам. Ён размешчаны ў заходняй частцы правінцыі Хэнань і ў старажытнасці быў цэнтрам Кітая.
"У перакладзе з кітайскай мовы "хуа чжан" азначае "цудоўны твор". Слова "хуа" таксама азначае "кітайская нацыя", а "чжан" - "сачыненне". "Чжан" вымаўляецца і як прозвішча аўтара. Менавіта таму фраза "Хуа Чжан" можа перакладацца як "традыцыйны кітайскі твор ад Чжана", - растлумачылі ў галерэі.
Сучасную фэшн-фатаграфію прэзентуе малады кітайскі фатограф У Цзівэй. Цяпер яму 25 гадоў, і ён студэнт аддзялення графічнага дызайну Беларускай дзяржаўнай акадэміі мастацтваў.
У Цзівэй адзначыў, што яго заўсёды прывыблівала выяўленчае мастацтва. З шасці гадоў пачаў рысаваць, удзельнічаў у многіх выстаўках у Шанхаі і Пекіне. "Сем гадоў таму я ўзяў у рукі камеру і ўпершыню паехаў у Еўропу. Менавіта гэта паездка падштурхнула мяне да сур'ёзнага захаплення фатаграфіяй. У 2022-м у якасці асноўнага напрамку работы мною была выбрана фэшн-фатаграфія. З майго пункту гледжання, здымка мадэлей - гэта самае непасрэднае адлюстраванне прыгажосці. І так здарылася, што мае здымкі трапілі ў модны часопіс", - падзяліўся фатограф. На яго думку, галоўнае ў фатаграфіі - не фотатэхніка і тэхналогіі, а менавіта выразнасць эстэтыкі.
Арганізатары падкрэслілі: праект - гэта своеасаблівы дыялог паміж старэйшым пакаленнем, якое прытрымліваецца традыцыйных поглядаў, і сучаснай моладдзю, якая пастаянна шукае новыя сродкі самавыяўлення.
Выстаўка ў галерэі будзе працаваць па 26 лютага.-0-