3 студзеня, Гомель /Кар. БЕЛТА/. Дванаццаць вымярэнняў сусвету адкрыецца на выставе Сержа Ардэна "Струны Сусвету" ў Гомелі, паведамілі БЕЛТА ў карціннай галерэі Г.Х Вашчанкі.
Руска-беларускі майстар амерыканскай школы жывапісу, бакалаўр мастацтваў, магістр тэхнічных навук, майстар-фатограф упершыню прадставіць свае работы ў Гомелі. Серж Ардэн сем гадоў навучаўся ў Маскве. У яго творчым багажы - 12 гадоў жыцця і работы ў Нью-Ёрку. Незвычайнасць работ аўтара тлумачыць яго жыццёвая і творчая філасофія.
"У пачатку 2000 года тысячагоддзяў, Серж Ардэн падарожнічаў па Каліфорніі. Пакінуўшы ў мінулым забавы і казіно Лас-Вегаса, зняўшы на шырокафарматную камеру панарамы Гранд-Каньёна, задумаў ажыццявіць даўнюю мару - убачыць Вялікі метэарытны кратар у Арызоне - свяшчэннае месца амерыканскіх індзейцаў. 50 тыс. гадоў таму жалезна-нікелевы метэарыт вагой 300 тыс. т урэзаўся ў Зямлю, утварыўшы варонку дыяметрам больш за кіламетр і глыбінёй 240 м. У раёне назіраюцца таямнічыя магнітныя анамаліі: стрэлка компаса нястрымна круціцца вакол сваёй восі. Уначы назіраецца загадкавае свячэнне ў небе. На краі кратара ў мастака закружылася галава, і ён на некалькі секунд страціў прытомнасць. Апрытомнеўшы, убачыў, што фарбы пейзажу наўкол сталі значна ярчэйшымі", - расказалі арганізатары.
Вярнуўшыся ў Нью-Ёрк, Серж Ардэн азнаёміўся з кнігай вядомага фізіка Браяна Грына "Элегантны Сусвет. Суперструны", у якой аўтар, звёўшы ў адно найноўшыя тэорыі фізікі, на мове формул апісаў 12 вымярэнняў Сусвету. Успрыманню чалавека даступны толькі пяць: тры фізічныя вымярэнні, час і думка. Астатнія сем - недасягальныя. Серж Ардэн ставіць перад сабой задачу паказаць на мове выяўленчага мастацтва мнагамернасць нашага Сусвету.
"У свой час Васіль Кандзінскі перавёў жывапіс у духоўнае вымярэнне, а Казімір Малевіч мастацтва суаднёс з космасам. Вырашана, што кожная карціна павінна мець 12 колерных слаёў. З іх сем кампазіцый перакрываюць адна адну і не відаць гледачу. Відаць толькі пяць апошніх, нанесеных струмене-алкіднымі эмалямі. Тэхніку наліўкі фарбаў на гарызантальнае палатно вынайшаў у сярэдзіне ХХ стагоддзя знакаміты амерыканскі абстракцыяніст Джэксан Полак, які пакарыў увесь свет сваім "Аўтаматычным жывапісам дзеяння". Крытыкі назвалі такія творы паліфанічнымі", - нагадалі арганізатары.
"Аднойчы Серж Ардэн з букетам белых ружаў адправіўся ў гарадок Спрынгс штата Нью-Ёрк, да магілы трагічна загінулага Джэксана Полака. Уначы Полак прыходзіць да мастака і дае наказ: "Зрабі тое, што я не паспеў". З таго моманту нібыта адкрываецца духоўны партал. Ардэн распрацоўвае канцэпцыі сямі жывапісных праектаў", - адзначылі ў карціннай галерэі Г.Х.Вашчанкі.
Усе праекты маюць унікальную філасофскую базу і арыгінальную канцэпцыю. Для жывапісна-графічных работ аўтар выкарыстоўвае белыя лісты шчыльнай мастацкай паперы. Белы колер, як сімвал сонечнага святла, таямнча змяшчае ў сабе сем колераў вясёлкі, бачных толькі пры раскладанні колеру скрозь прызму, а пяць колерных слаёў на паперы служаць сімвалам даступных вымярэнняў. Кожны твор Сержа Ардэна змяшчае вобразы 12 вымярэнняў сусвету, з якіх сем скрытых і пяць відавочных.
Адкрыццё выставы намечана на 5 студзеня ў 16.00. У праграме - творчы вечар маэстра "Дыялог з Сусветам".
Убачыць работы можна да 31 студзеня.-0-
