26 жніўня, Масква /Эдуард Півавар - БЕЛТА/. Дні расійскага кіно пройдуць у Мінску з 26 па 28 жніўня пад брэндам Russian Film Festival. Яны праводзяцца кампаніяй "Роскіно" пры падтрымцы Міністэрства культуры Расіі, паведамілі карэспандэнту БЕЛТА арганізатары мерапрыемства.
"Жыхары і госці Мінска ўбачаць на вялікім экране сямейны прыгодніцкі фільм пра сапраўднае сяброўства "Пальма", супергеройскае кіно "Маёр Гром: Чумны Доктар", мультфільм пра прыгоды дамавіка "Фінік", лірычную камедыю "Партрэт незнаёмца" і трагікамедыю "Першы снег", - расказалі ў "Роскіно".
Генеральны дырэктар "Роскіно" Іна Шалыта адзначыла, што Дні расійскага кіно стануць культурнай акцыяй у адказ на Дні беларускага кіно, якія праходзілі ў Маскве ў чэрвені. "Мы рады прадстаўляць у Беларусі фільмы сучасных расійскіх аўтараў, - сказала яна. - Расію і Беларусь аб'ядноўвае вялікае культурнае мінулае, беларускі кінематограф унёс немалы ўклад у развіццё савецкай індустрыі кіно, у нас ёсць вопыт сумеснай кінавытворчасці. Сумесная гісторыя, агульныя каштоўнасці і багаты вопыт супрацоўніцтва даюць перадумовы да нарошчвання партнёрства ў сферы крэатыўнай індустрыі ў цэлым і кінаіндустрыі ў прыватнасці. У чэрвені ў Маскве праходзілі Дні беларускага кіно, цяпер мы паказваем у Мінску расійскае кіно, і важна прадаўжаць праводзіць такія мерапрыемствы для развіцця як культурнага, так і індустрыяльнага дыялогу".
Упершыню паказы расійскага кіно пад брэндам Russian Film Festival прайшлі ў Беларусі ў рамках XXVII Мінскага кінафестывалю "Лістапад" у 2021 годзе і карысталіся вялікай цікавасцю ў гледачоў.-0-
