14 кастрычніка, Масква /Эдуард Півавар - БЕЛТА/. Дні культуры Беларусі ў Расіі плануецца правесці з 31 кастрычніка па 3 лістапада. Аб гэтым, адказваючы на пытанне карэспандэнта БЕЛТА, паведаміў першы намеснік міністра культуры Беларусі Валерый Грамада.
Паводле яго слоў, у афішу дзён увойдуць два спектаклі Нацыянальнага акадэмічнага тэатра імя Янкі Купалы "Паўлінка" і "Вечар". Будзе таксама разгорнута выстава твораў беларускіх мастакоў. Акрамя таго, будуць арганізаваны дні беларускага кіно.
Паводле слоў першага намесніка міністра, усе мерапрыемствы намечана правесці ў Маскве. Аднак, удакладніў ён, канчатковая праграма яшчэ прапрацоўваецца і геаграфія мерапрыемстваў можа быць пашырана.
Да правядзення Дзён беларускай культуры будзе таксама прымеркавана правядзенне сумеснага пасяджэння калегій міністэрстваў культуры дзвюх краін.
Статс-сакратар - намеснік міністра культуры Расіі Ала Манілава дадала, што да канца бягучага года расійскі бок мае намер арганізаваць у Беларусі дзве выставы. Адна з іх пад назвай "Мінская школа мастакоў" прадставіць фатаграфіі з фондаў Дзяржаўнага выставачнага цэнтра "Расфота" ў Санкт-Пецярбургу. Другая выстава будзе прысвечана сучаснай расійскай фатаграфіі.
Паводле слоў Алы Манілавай, да гэтых выстаў плануецца прымеркаваць правядзенне розных творчых праектаў. У прыватнасці, намечана арганізаваць расійска-беларускую творчую платформу для падтрымкі маладзёжных стартапаў.
Валерый Грамада і Ала Манілава сёння ў Маскве прынялі ўдзел у пасяджэнні экспертнага савета па прэміях Саюзнай дзяржавы ў галіне літаратуры і мастацтва пры Пастаянным камітэце Саюзнай дзяржавы, на якім былі вызначаны тры намінанты на гэту ўзнагароду.-0-
