5 красавіка, Мінск /Кар. БЕЛТА/. У Нацыянальным мастацкім музеі Беларусі 26 мая пройдзе Міжнародная навукова-практычная канферэнцыя "Аладаўскія чытанні - 2022", прысвечаная 100-годдзю з дня нараджэння народнага мастака Беларусі Міхаіла Савіцкага, паведамілі БЕЛТА ва ўстанове.
На канферэнцыі прапануецца абмеркаваць творчасць народнага мастака Беларусі Міхаіла Савіцкага ў кантэксце культуры і мастацтва XX-XXI стагоддзяў; актуальныя тэндэнцыі ў галіне сучаснага выяўленчага мастацтва; атрыбуцыю і навуковыя даследаванні твораў мастацтва з музейных калекцый; практычны вопыт і гістарычную перспектыву рэстаўрацыі музейных прадметаў; сучасныя магчымасці музейнай камунікацыі, тэорыю і практыку музейнага менеджменту і маркетынгу, інклюзію ў музейнай сферы.
"Да ўдзелу ў канферэнцыі запрашаюцца мастацтвазнаўцы, музеязнаўцы, рэстаўратары, гісторыкі, культуролагі і прадстаўнікі сумежных дысцыплін, якія разглядаюць магчымасць інфармаваць грамадскасць аб сваіх прафесійных напрацоўках", - адзначылі арганізатары.
Рэгламент канферэнцыі: даклады - да 15 хвілін, выступленні і паведамленні ў дыскусіях - да 5 хвілін.
Мовы канферэнцыі: беларуская, руская.
Заяўку на ўдзел і тэкст даклада з паметкай "Аладаўскія чытанні" неабходна выслаць па электроннай пошце aneiko@artmuseum.by не пазней за 10 красавіка 2022 года.-0-
