26 мая, Мінск /Кар. БЕЛТА/. Беларускі саюз мастакоў робіць шмат розных выстаў, каб даць магчымасць моладзі раскрыцца, заявіла сёння журналістам першы намеснік старшыні Беларускага саюза мастакоў мастацтвазнавец Наталля Шаранговіч, перадае карэспандэнт БЕЛТА.
"У нашых праектах удзельнічае шмат моладзі, і гэта невыпадкова. Мы спецыяльна робім шмат розных рэспубліканскіх выстаў, каб даць магчымасць творчай моладзі раскрыць сябе. Для нас прынцыпова важна, каб паказвалі свае работы юнакі і дзяўчаты не толькі з Мінска, але і з усіх куткоў краіны. А самае галоўнае, што гэтымі шматлікімі выставамі мы стараемся стварыць цікавы, яркі, насычаны мастацкі ландшафт у сталіцы", - сказала Наталля Шаранговіч.
Паводле слоў намесніка старшыні, БСМ стараецца, каб у выставах удзельнічалі не толькі вядомыя мастакі, але абавязкова моладзь. "Праходзіць час, людзі становяцца старэйшымі, і нам хочацца, каб саюз мастакоў стаў арганізацыяй, якая прыцягвае студэнтаў, маладых выпускнікоў Акадэміі мастацтваў і іншых ВНУ. Хочацца, каб сюды прыходзілі людзі, якія разумеюць, што менавіта ў БСМ ёсць творчасць, цікавыя праекты, у якіх хочацца ўдзельнічаць", - падкрэсліла яна.
Гэты год для саюза мастакоў багаты на розныя праекты. "Мы самі для сябе прыдумалі такую вялікую праграму, напэўна, для таго, каб усё ж такі паказаць, што сучаснае беларускае мастацтва абсалютна адкрыта для гледачоў і саміх мастакоў, каб мы маглі падыскутаваць, паразмаўляць. Ствараючы праграму на гэты год, мы хацелі максімальна пашырыць рамкі мастацтва, паказаць розныя віды, напрамкі, жанры, мастакоў, у тым ліку зрабіць вялікую выязную праграму", - расказала мастацтвазнавец.
Шматлікія выставы паказалі, што наведвальнікі праяўляюць цікавасць да розных мастакоў і форм мастацтва. "Людзі гатовы аб гэтым гаварыць, абмяркоўваць класічнае і некласічнага, традыцыйнае і авангарднае мастацтва. Яны разважаюць, таму што ім гэта сапраўды цікава", - упэўнена Наталля Шаранговіч.
Акрамя таго, 27 мая ў Палацы мастацтваў практычна адначасова адкрыюцца тры вялікія праекты: фестываль жывапісу "Лабірынт. Бясконцасць", фестываль арт-фатаграфіі "МОСТ-21" і выстава мастацтва графічнага дызайну "ЛітАрт". У зале "Арт-Беларусь" ужо працуе экспазіцыя "Унутраны накапляльнік" вядомага скульптара Канстанціна Селіханава, якая будзе добрым дадаткам да ўсяго фестывалю.-0-
