Сцяг Пятніца, 29 сакавіка 2024
Усе навіны
Усе навіны
Культура
31 жніўня 2020, 13:11

Брэсцкія лялечнікі адкрыюць тэатральны сезон прэм'ерай

31 жніўня, Брэст /Кар. БЕЛТА/. Брэсцкі тэатр лялек адкрые 5 верасня новы тэатральны сезон прэм'ерай, паведаміла карэспандэнту БЕЛТА дырэктар тэатра Тамара Паўлюковіч.

Юным гледачам пакажуць спектакль "Пералётныя" ў пастаноўцы рэжысёра Алісы Ярмак. У аснову пакладзены мультфільм сучаснага расійскага ілюстратара, сцэнарыста і прадзюсара Юліі Аронавай. Кранальная гісторыя курачкі-фантазёркі Зіны, якая марыць навучыцца лятаць, мае глыбокі філасофскі сэнс, эфект якога ўзмацняюць сцэнаграфія мастака Вольгі Мельнік-Малахавай і гукавы рад Канстанціна Крыштаповіча. Спектакль вучыць не здавацца на дарозе да сваёй мары, імкнуцца да дасягнення пастаўленай мэты.

Адной прэм'ерай адкрыццё 58-га тэатральнага сезона не абмяжуецца. У гэты ж дзень у 13.00 брэсцкія лялечнікі пакажуць сваім гасцям казку Валянціна Катаева "Кветачка-вясёлка". А ў гульнявым пакоі адбудзецца невялікі спектакль для гледачоў двух гадоў з іх мамамі "Гісторыя пра хцівых медзведзянят". У праграме свята таксама - флэш-моб ад харэаграфічнай студыі, майстар-клас ад студыі творчага развіцця, вступленне выхаванцаў студыі эстраднага вакалу.

"Актыўна рыхтуемся да доўгачаканай сустрэчы з гледачамі. Будзем працаваць на поўную сілу, таму што гатовы і хочам гэтага. Вельмі спадзяёмся, што новы тэатральны сезон будзе ўдалым. Ва ўсякім разе, адна прыемная навіна ўжо ёсць. Наш спектакль "Сотнікаў" намініраваны на Нацыянальную тэатральную прэмію і прайшоў ужо ў другі тур. Паказ адбудзецца ў кастрычніку на Х форуме тэатральнага мастацтва "ТЭАРТ". Мы ўжо атрымалі запрашэнне", - сказала дырэктар БТЛ.

Паводле яе слоў, у тэатры пачалі ўжо працаваць над новай пастаноўкай у суаўтарстве з маладым беларускім драматургам Дзмітрыем Багаслаўскім. Рабочая назва спектакля для дзяцей - "Крылы матылька". Рэжысёрам выступае Аліса Ярмак, над сцэнаграфіяй працуе мастак Уладзімір Ткачэнка. Адначасова ідзе падрыхтоўка да Новага года. Вядомы беларускі рэжысёр Ігар Казакоў і мастак Вольга Дваравая паставяць на сцэне новага Брэсцкага тэатра лялек спектакль па матывах твораў Ханса Крысціяна Андэрсена.-0-

Падпісвайцеся на нас у
Twitter
Топ-навіны
Свежыя навіны Беларусі