16 сакавіка, Брэст /Кар. БЕЛТА/. Акцыя "Зведайце ноч у тэатры" пройдзе 25 сакавіка ў Брэсцкім акадэмічным тэатры драмы, паведаміла карэспандэнту БЕЛТА загадчык літаратурна-драматургічнай часткі БАТД Вера Шэлест.
Праект прымеркаваны да Міжнароднага Дня тэатра, які адзначаецца 27 сакавіка. На гэты раз канцэпцыя мерапрыемства кардынальна змянілася. Калі папярэднія гады ўпор рабіўся на майстар-класы, адкрытыя рэпетыцыі, экскурсіі, то цяпер гасцям прадставіцца магчымасць не проста ўбачыць або пачуць, але зведаць розныя грані тэатральнага працэсу. Прасякнуцца гэтым асаблівым светам дасць магчымась інтэрактыўны эксперымент артыстаў, які пройдзе ў фармаце гульнявога квеста за кулісамі тэатра. Для паспяховага выканання задання ўдзельнікам рэкамендуюць падрабязна азнаёміцца з рэпертуарам і гісторыяй БАТД.
Таксама ў праграме вечара - выступленне сімфанічнага аркестра ў фае тэатра, выстаўка фотаздымкаў "Эмоцыі", на якіх артысты з дапамогай мімікі адлюструюць усю магчымую палітру чалавечых пачуццяў і перажыванняў. На заканчэнне ў бары тэатра гледачоў чакае канцэртная праграма "Акцёры чытаюць". У суправаджэнні жывой музыкі яны выканаюць творы сучасных і класічных аўтараў.
Абавязковай умовай для ўдзельнікаў акцыі "Ноч у тэатры" з'яўляецца захаванне дрэс-коду. "Святочны вечар пройдзе ў фармаце total black. Гэта значыць, што ў касцюмах наведвальнікаў дапускаюцца толькі адценні чорнага. Гэта традыцыйны колер тэатра. Адзенне сцэны першапачаткова чорнае, а потым ужо дзякуючы тэатральнаму чарадзейству тут ствараецца новая прастора. І ў нашым квесце сцэна - гэта чорны кабінет", - растлумачыла задуму Вера Шэлест.
Білеты на "Ноч у тэатры", колькасць якіх абмежавана, у продаж паступяць 17 сакавіка.-0-