7 кастрычніка, Мінск /Кар. БЕЛТА/. Урачыстая цырымонія ўзнагароджання лепшых работнікаў устаноў культуры ганаровымі граматамі Мінгарвыканкама і ўпраўлення культуры сталічнай мэрыі, а таксама гарадской арганізацыі Беларускага прафесійнага саюза работнікаў культуры, інфармацыі, спорту і турызму прайшла сёння ў гарадской ратушы, паведамляе БЕЛТА са спасылкай на Telegram-канал "Мінск. Афіцыйна".
Напярэдадні прафесійнага свята больш за 20 сталічных артыстаў, музыкантаў, работнікаў музеяў, тэатраў, бібліятэк, школ мастацтваў атрымалі ўзнагароды за добрасумленную і плённую працу.
"Без аб'ектаў культуры, без людзей, якія дораць прыгожае, складана ўявіць жыццё. Уклад, які вы ўносіце ў развіццё нашага горада, каласальны, - адзначыў старшыня Мінгарвыканкама Уладзімір Кухараў, звяртаючыся да віноўнікаў урачыстасці. - І гэта вялікая адказнасць, таму што вы працуеце з усімі пакаленнямі, пачынаючы ад самых маленькіх, якім трэба прывіць цёплае стаўленне да нашай культуры, нашай гісторыі. Захаванне і прымнажэнне такога багацця дарагога каштуе".-0-