4 мая, Мінск /Кар. БЕЛТА/. Выстава мастацкага тэкстылю і касцюма студэнтаў і выпускнікоў Беларускай дзяржаўнай акадэміі мастацтваў "Бясконцая фантазія" пройдзе ў Арт-гасцёўні "Высокае мѣста" 6 мая. Аб гэтым БЕЛТА паведамілі ў прэс-службе Музея гісторыі горада Мінска.
"Мастацкія вобразы тканін складваюцца з бесперапынных матываў, складаных перапляценняў нітак і ўзораў, якія сплятаюцца ў бясконцыя фантазійныя арнаменты. У аснове працэсу стварэння твора ўнікальная ідэя, якая нараджаецца бязмежнай фантазіяй маладых аўтараў", - расказалі ў прэс-службе.
На выставе прадстаўлена больш за 70 курсавых і творчых праектаў студэнтаў і выпускнікоў напрамкаў спецыяльнасці "ДПМ (вырабы з тэкстылю)" і "ДПМ (касцюм)", створаныя за апошнія гады. Наведвальнікі змогуць азнаёміцца з шырокім спектрам сэнсавых, тэхналагічных і фармальна-пластычных магчымасцей твораў сучаснага мастацтва тэкстылю і касцюма.
"Лічбавы друк па тканіне, габелен, ручное ткацтва, мастацкі роспіс па тканіне злучаюцца з эксперыментальнымі прыёмамі, змешанымі тэхнікамі і аўтарскімі падыходамі. Вывучаючы розныя магчымасці дэкарыравання і трансфармацыі тэкстыльных матэрыялаў, студэнты распрацоўваюць калекцыі тканін і аксесуараў, калекцыі адзення прэт-а-партэ і авангарднай моды, тэатральны касцюм і шмат іншага", - падзяліліся ва ўстанове.
Экспазіцыю дапаўняюць канцэптуальныя інсталяцыі, арт-аб'екты, творы энвайранменту ў касцюме, якія з'яўляюцца актуальнымі напрамкамі ў сучасным мастацтве тэкстылю.
Выстава прадоўжыцца па 12 чэрвеня.-0-
