8 кастрычніка, Мінск /Кар. БЕЛТА/. Білеты ў глядзельную залу на галоўнае шоу дзіцячага "Еўрабачання-2018" прададзены, але ў рэалізацыі застаюцца білеты на танцпляцоўку і генеральную рэпетыцыю. Аб гэтым карэспандэнту БЕЛТА паведамілі ў прэс-службе Белтэлерадыёкампаніі.
"Усе білеты ў глядзельную залу на галоўнае мерапрыемства дзіцячага "Еўрабачання" прададзены, застаюцца білеты на танцпляцоўку і генеральную рэпетыцыю, якая пройдзе 24 лістапада ў фармаце гала-канцэрта, аналагічнага галоўнаму шоу. Менавіта ў час яе журы ацэньвае канкурсантаў, атрыманыя рэзультаты будуць аб'яўлены ў прамым эфіры ў час фіналу", - расказалі ў прэс-службе.
Як паведамлялася раней, білеты можна набыць анлайн на сайтах bycard.by, afisha.tut.by, afisha.relax.by, з дапамогай мабільных дадаткаў пад Android і iOS на play.google.com і itunes.apple.com, а таксама на афіцыйным сайце Белтэлерадыёкампаніі. Больш за 100 кас па ўсёй краіне рэалізоўваюць білеты ў салонах сувязі "Ало", магазінах "Электрасіла" і турыстычных кампаніях "Бі-тур", "Тур-Атэлье", "Топ-тур", "Турбери". Кошт білетаў на генеральную рэпетыцыю конкурсу ад Br6 да Br9, а на фінальнае шоу - ад Br9 да Br12.
Сёння ў "Прэзідэнт-Атэлі" ў Мінску сабралася каманда экспертаў, якая кантралюе падрыхтоўку шоу. Для прафесіяналаў з Вялікабрытаніі, Германіі, Мальты, Нідэрландаў, Італіі, Грузіі, Расіі, а таксама выканаўчага дырэктара "Еўрабачання" Ён Ола Санда прайшла прэзентацыя ўсіх этапаў падрыхтоўкі да конкурсу - ад цырымоніі адкрыцця да сацыяльнай праграмы для ўдзельнікаў.
Міжнароднае песеннае шоу адбудзецца 25 лістапада ў "Мінск-Арэне". Форум у гэтым годзе збярэ рэкордную колькасць удзельнікаў - 20 краін. Арганізатарам і каардынатарам усіх мерапрыемстваў дзіцячага "Еўрабачання-2018" выступае Белтэлерадыёкампанія як адзіны ў краіне член Еўрапейскага вяшчальнага саюза.
Беларусь на дзіцячым "Еўрабачанні-2018" прадставіць Даніэль Ястрэмскі. Ён стаў пераможцам фіналу нацыянальнага адбору на міжнародны песенны форум з кампазіцыяй "Time". Даніэлю 14 гадоў, ён нарадзіўся ў горадзе Цынцынаці (ЗША), але жыве і вучыцца ў Мінску, дзе прайшоў навучанне ў музычнай школе па класе фартэпіяна. Юны выканаўца - удзельнік тэлевізійных шоу і конкурсаў, такіх як "Ва Украіны ёсць таленты", "Дзіцячая Новая хваля", удзельнічаў у кастынгу шоу "Голас. Дзеці" (Расія). Даніэль навучаўся ў Акадэміі Ігара Крутога.-0-
