5 кастрычніка, Мінск /Кар. БЕЛТА/. Канцэрт "Святло далёкай зоркі", прысвечаны народнаму артысту Савецкага Саюза Мусліму Магамаеву, пройдзе 19 кастрычніка ў Малой зале імя Р.Шырмы Беларускай дзяржаўнай філармоніі, паведамілі БЕЛТА ва ўстанове.
"Час, які пастаянна цячэ, бывае што вяртаецца. У гэтым дапамагае музыка, якая аб'ядноўвае розныя пакаленні. На канцэрце прагучаць лепшыя песні, рамансы і арыі з рэпертуару артыста ў выкананні лаўрэатаў і дыпламантаў міжнародных і нацыянальных конкурсаў, салістаў Белдзяржфілармоніі. Выступяць Уладзіслаў Даніловіч, Максім Абравец, Дзмітрый Тунік, Тамара Рэмез, Святлана Старадзетка і Валянціна Дабравольская. Публіка пачуе музычныя кампазіцыі "Мелодыя", "Дзякую табе", "Чортава кола", "Вяселле", "Не спяшайся", "Каралева прыгажосці", "О, мора, мора" ("Сіняя вечнасць") і шмат іншых папулярных песень, а таксама вядомыя арыі і дуэты", - расказалі ва ўстанове культуры.
Партыю фартэпіяна на канцэрце выканаюць лаўрэаты міжнародных конкурсаў Сяргей Вайніцкі і Вольга Макеева. Вядучая вечарыны Любоў Сыцько.
Муслім Магамаеў - выдатны артыст, кампазітар, эстрадны і оперны спявак. Ён па праву лічыцца адным з лепшых барытонаў свету. Паводле слоў арганізатараў канцэрта, папулярнасць спевака была неверагоднай: яго голас пастаянна гучаў па радыё і тэлебачанні, а імя было вядома ледзь не кожнаму жыхару СССР. "Канцэрты Мусліма Магамаева збіралі шматтысячныя стадыёны, пласцінкі спевака выходзілі мільённымі тыражамі. У рэпертуары выканаўцы звыш 600 твораў, сярод якіх арыі, рамансы і эстрадныя песні", - рэзюмавалі ў філармоніі.-0-
