25 жніўня, Мінск /Кар. БЕЛТА/. Беларусы ўпершыню прынялі ўдзел у Другім пецярбургскім міжнародным тыдні балалайкі "Рускі цуд". Аб гэтым БЕЛТА паведамілі арганізатары фестывалю.
Прыгожай, яркай і музычнай кропкай у гэтай новай главе ў гісторыі развіцця народнага мастацтва сталі канцэрты пад адкрытым небам "Рускі цуд". Дуэт братоў Моніных з Брэста, мінскі ансамбль Crescendo, навучэнцы дзіцячай музычнай школы мастацтваў нумар 12 Мінска, Рэспубліканскай гімназіі - каледжа пры Беларускай дзяржаўнай акадэміі музыкі, а таксама дзіцячай школы мастацтваў нумар 6 Гомеля пакарылі сэрцы жыхароў Пецярбурга і гасцей горада.
Як адзначылі беларускія ўдзельнікі фестывалю, культурна-адукацыйная праграма форуму была на высокім узроўні. Яна дапамагла не толькі пашырыць кола тэарэтычных ведаў і практычных навыкаў, звязаных з рускімі народнымі інструментамі, але і наладзіць карысныя кантакты з пецярбургскімі профільнымі спецыялістамі і настаўнікамі. "Сёння ўзровень выканання на балалайцы ўзняты вельмі высока. Адсюль і слава аркестраў па ўсім свеце, і нават у Японіі сталі іграць на балалайках, прычым не нашы эмігранты, а самі японцы. Васіль Андрэеў у XIX стагоддзі не проста зрабіў балалайку папулярнай - ён удасканаліў яе так, што гэты інструмент можа цяпер пастаянна развівацца, калі, вядома, у выканаўца хопіць сваёй фантазіі і ідэй", - сказаў кіраўнік "Церам-квартэта" Андрэй Канстанцінаў.
Канцэртная балалайка - гэта дзецішча выдатнага рускага музыканта, кампазітара і грамадскага дзеяча Васіля Андрэева. Музыкант заснаваў у 1888 годзе Дзяржаўны акадэмічны рускі аркестр (былы Імператарскі велікарускі аркестр). У самым пачатку свайго існавання ўнікальны калектыў рускіх народных інструментаў заваяваў сусветнае прызнанне. "Рускім цудам" замежныя крытыкі і журналісты называлі балалайку ў час замежных гастролей Андрэеўскага аркестра.
У час Другога Пецярбургскага міжнароднага тыдня балалайкі "Рускі цуд" для ўдзельнікаў арганізавалі майстар-класы, лекцыі, творчыя сустрэчы і сумесныя рэпетыцыі, наведванне майстэрняў, а таксама круглыя сталы. Арганізатарам выступіў Тэатр-фестываль "Балтыйскі дом" па даручэнні камітэта па знешніх сувязях Санкт-Пецярбурга.-0-
