ДЗЯРЖОРГАНЫДЗЯРЖОРГАНЫ
Флаг Субота, 18 верасня 2021
Мінск Пераменная воблачнасць +6°C
Усе навіны
Усе навіны
Культура
13 ліпеня 2021, 16:13

Беларускія тэатры прадставяць на фестывалі "Белая вежа" цікавую праграму - арганізатары

13 ліпеня, Брэст /Кар. БЕЛТА/. Работы дзевяці творчых калектываў з Беларусі стануць удзельнікамі XXV Міжнароднага тэатральнага фестывалю "Белая вежа", паведамілі сёння на прэс-канферэнцыі арганізатары, перадае карэспандэнт БЕЛТА.

"У гэтым годзе вельмі цікавая беларуская праграма. Калі яна сфарміравалася, у мяне нават з'явіўся гонар. Думаю, многія калегі і тэатральныя крытыкі будуць недзе і зайздросціць, - сказаў дырэктар фестывалю, мастацкі кіраўнік Брэсцкага акадэмічнага тэатра драмы заслужаны дзеяч мастацтваў Беларусі Аляксандр Козак. - Раней мы больш увагі звярталі на значныя ў тэатральным творчым працэсе замежныя пастаноўкі, у гэтым годзе будзем ганарыцца сваімі дасягненнямі. Заяўленыя пастаноўкі павінны быць цікавыя не толькі прафесіяналам, але і радавому гледачу".

Адкрые фестывальную праграму 10 верасня спектакль Нацыянальнага акадэмічнага драматычнага тэатра імя М. Горкага "Пане Каханку". У фестывальнай афішы таксама пастаноўка Рэспубліканскага тэатра беларускай драматургіі "Шлюб з ветрам". Гаспадары форуму прадставяць апошнюю прэм'еру сезона - спектакль рэжысёра Дзяніса Фёдарава "Дзень Б." Палескі драмтэатр пакажа "Вія", Новы драматычны тэатр з Мінска - "Нобелеўскі тыдзень", Беларускі музычны тэатр - "Вяселле ў стылі рэтра".

Зорным складам прадстаўлены лялечныя спектаклі. Гледачы ўбачаць "Кандзід, або Аптымізм" Магілёўскага абласнога тэатра лялек у пастаноўцы лаўрэата Нацыянальнай тэатральнай прэміі Ігара Казакова. Брэсцкі тэатр лялек пакажа спектакль лаўрэата Нацыянальнай тэатральнай прэміі Беларусі і расійскай прэміі "Залатая маска" Аляксандра Янушкевіча "Новая зямля". Беларускі дзяржаўны тэатр лялек прадставіць "Запiскi юнага ўрача" паводле цыкла апавяданняў Міхаіла Булгакава.

XXV Міжнародны тэатральны фестываль "Белая вежа" пройдзе ў Брэсце з 10 па 18 верасня. Юбілейны форум прысвечаны 30-годдзю стварэння Садружнасці Незалежных Дзяржаў і праводзіцца пры садзейнічанні Міждзяржаўнага фонду гуманітарнага супрацоўніцтва. У фестывальнай афішы заяўлены 22 тэатры з 7 краін - Беларусі, Арменіі, Грузіі, Казахстана, Малдовы, Расіі і Таджыкістана.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі