25 кастрычніка, Мінск /Кар. БЕЛТА/. Прэм'ерны паказ поўнаметражнага анімацыйнага фільма Нацыянальнай кінастудыі "Беларусьфільм" "Зоркі сёмага неба" з поспехам прайшоў у Маскве. Аб гэтым карэспандэнту БЕЛТА паведаміла прэс-сакратар кінастудыі Алёна Астаповіч.
"Мультфільм прадставіла яго рэжысёр Алена Турава. Гледачы высока ацанілі навінку беларускай анімацыі, і дарослыя, і дзеці выказалі ўдзячнасць рэжысёру за добрую музычную казку і неверагодныя эмоцыі пасля яе прагляду", - падзялілася Алёна Астаповіч.
На прэм'еры прысутнічаў вядомы савецкі і расійскі рэжысёр-мультыплікатар, аўтар такіх работ, як "Антоська", "Вясёлая карусель", "Рыжы, рыжы, рабаваты", "Жыў у бабулі казёл", мастак-мультыплікатар "Брэменскіх музыкантаў" і "Канікулаў Баніфацыя" Леанід Носыраў. "Леанід Віктаравіч павіншаваў усю студыю анімацыйных фільмаў "Беларусьфільма" з удалай цудоўнай работай высокага ўзроўню", - адзначылі ў прэс-службе.
Акрамя таго, паказ наведалі знакаміты гукарэжысёр Віктар Морс, які выступіў у ролі аднаго з гукарэжысёраў і ў ролі гукарэжысёра перазапісу "Зорак сёмага неба", а таксама Барыс Венгероўскі - чалавек-легенда, адзін з найстарэйшых расійскіх гукарэжысёраў.
Над анімацыйным фільмам працавалі пяць гадоў, у яго аснове - аднайменная кніга Генадзя Давыдзькі. Спецыяльна для гэтага праекта кампазітар Леанід Шырын напісаў больш за 40 песень. Галоўныя ролі агучылі беларускія артысты.
"Сюжэт мультфільма просты: шэсць монстраў закрываюць усе зоркі, называючы зоркамі сябе. Людзі перастаюць глядзець на неба і марыць, ад чаго з цягам часу становяцца злымі і бязлітаснымі. Выратаваць планету могуць толькі летуценнікі. Так збіраецца каманда з хлопчыка Сашы, ката Мурмота і дзяўчынкі Элі, якім наканавана адправіцца ў падарожжа і справіцца з усімі каварнымі монстрамі", - расказалі на кінастудыі.-0-
