26 мая, Мінск /Кар. БЕЛТА/. Анімацыйны фільм "Лепшае месца на свеце" рэжысёра Ірыны Тарасавай вытворчасці Нацыянальнай кінастудыі "Беларусьфільм" атрымаў перамогу ў катэгорыі "Лепшы анімацыйны фільм для дзяцей" на 21-м міжнародным фестывалі анімацыйнага кіно Animatricks. Аб гэтым карэспандэнту БЕЛТА паведамілі ў прэс-службе кінастудыі.
Мерапрыемства прайшло 20-23 мая ў Хельсінкі. Гэты найбуйнейшы ў Фінляндыі анімацыйны фестываль праходзіць пад патранажам ASIFA - Міжнароднай асацыяцыі анімацыйнага кіно. У конкурснай праграме фестывалю прымалі ўдзел звыш 200 мультфільмаў з усіх канцоў свету. У катэгорыі анімацыі для дзяцей за перамогу змагаліся 30 работ і беларускі мультфільм быў прызнаны лепшым з іх.
"Анімацыйны фільм "Лепшае месца на свеце" расказвае пра юнае мышаня, якое, пачуўшы баладу пра цудоўны свіран, поўны збожжа, дзе мышы жывуць бесклапотна, пакідае родныя норы і адпраўляецца на пошукі гэтага цудоўнага месца", - адзначылі ў прэс-службе.-0-
