Беларускі анімацыйны фільм заваяваў бронзу на кінафоруме "Залаты Віцязь" у Севастопалі

2 чэрвеня, Мінск /Кар. БЕЛТА/. Анімацыйны фільм "Песня Сірын" вытворчасці кінастудыі "Беларусьфільм" заваяваў бронзавую ўзнагароду ў намінацыі "Лепшы анімацыйны фільм" на міжнародным кінафоруме "Залаты Віцязь" у Севастопалі (Рэспубліка Крым). Аб гэтым БЕЛТА паведамілі ў прэс-службе Нацыянальнай кінастудыі.

Урачыстая цырымонія і ўзнагароджванне пераможцаў прайшлі ў музейна-храмавым комплексе. Па выніках конкурсу журы выявіла найлепшыя работы сярод ігравых, дакументальных поўнаметражных і кароткаметражных фільмаў, стужак для дзяцей і падлеткаў, анімацыйных, дэбютных і студэнцкіх фільмаў.

Рэжысёр анімацыйнага фільма "Песня Сірын" Алена Турава падкрэсліла, што кінастужка заснавана на славянскім фальклоры, які не так шырока вядомы ў свеце, як сюжэты старажытнагрэчаскай, скандынаўскай, егіпецкай міфалогіі, і, на жаль, пісьмовых крыніц нашых гісторый не захавалася.

Паводле слоў Алены Туравай, каманда, якая працавала над фільмам, старалася паказаць, што славянскі фальклор не ўступае вядомым паданням іншых краін. Стваральнікі "Песні Сірын" вывучалі гісторыю касцюма, музейныя артэфакты, арнаменты на прадметах побыту і вышыўках і народныя песні, каб акунуць гледача ў славянскую культуру і ў той жа час падарыць яму захапляючыя прыгоды.-0-