ДЗЯРЖОРГАНЫДЗЯРЖОРГАНЫ
Флаг Чацвер, 29 верасня 2022
Мінск +10°C
Усе навіны
Усе навіны
Культура
13 ліпеня 2022, 09:04

Беларус - першы, расіянка - другая. На "Славянскім базары" прайшла жараб'ёўка дзіцячага конкурсу

13 ліпеня, Віцебск /Кар. БЕЛТА/. На жараб'ёўцы ў інтэрактыўным цэнтры жывой гісторыі "Варгенторн" стала вядома, хто з юных артыстаў пад якім нумарам выступіць на XX Міжнародным дзіцячым музычным конкурсе "Віцебск", перадае карэспандэнт БЕЛТА.

Канкурсантам трэба было выбраць "чароўныя" фестывальныя нумары - яны вызначалі парадак выступленняў для першага дня конкурсу. Затым артысты накіроўваліся да стала з сувенірнымі "майкамі лідара", разгарнуўшы якія даведваліся нумар, пад якім выступяць у другі дзень песеннага спаборніцтва.

Беларусь на юбілейным дзіцячым конкурсе прадставіць выхаванец Дзіцячай музычнай школы мастацтваў нумар 1 г. Мінска Елісей Касіч. Са сваіх амаль трынаццаці гадоў восем ён займаецца вакалам. Ужо заўтра, 13 ліпеня, перад дасведчанай віцебскай публікай беларус выканае песню "Неба пажар" Валерыя Шмата на роднай мове, напісаную спецыяльна для яго ў мінулым годзе. Елісею давядзецца адкрываць першы конкурсны дзень - выпаў нумар 1. У другі, 14 ліпеня, ён выйдзе на сцэну пад нумарам 7.

"Сам нумар для мяне - гэта не вельмі важна, паколькі журы будзе ацэньваць вакал, перадачу песні. Галоўнае - гэта настрой. На "Славянскім базары" я ўпершыню буду выступаць у якасці канкурсанта, прадстаўляць сваю родную краіну. У адборах я ўдзельнічаў тры разы, і ўсе тры разы даходзіў да фіналу. Падрыхтоўка была даволі складанай, трэба было кардынальна змяніць канцэпцыі нумароў. Гэта і сцэнічны вобраз, касцюм, і напісанне новых аранжыровак, - падзяліўся юны артыст. - Прадстаўляць сваю краіну на гэтым конкурсе - вельмі адказна. Я лічу, што ўсё будзе так, як павінна быць, але абавязкова прыкладу максімум намаганняў для перамогі і дастойнага выступлення".

На другім конкурсным дні Елісей выканае хіт Селін Дыён "I Surrender". У глядзельнай зале ў яго будзе вялікая група падтрымкі - каманда прадзюсарскага цэнтра "Спамаш", бацькі і сябры.

Адразу за беларусам у першы дзень дзіцячага конкурсу свае вакальныя таленты прадэманструе расіянка Юлія Гаўрылава. На другім канцэрце яна будзе выступаць дзясятай. Як адзначылі вядучыя жараб'ёўкі, упершыню на "Славянскім базары" на дзіцячым конкурсе выпала тры дублі: Алан Вігаль з Ізраіля абодва дні пад нумарам 13, Элізабет Спарання з Італіі выйдзе восьмай, а Алінур Хамзін з Казахстана - чацвёртым. Цікава, што хлопцы і дзяўчаты жэрабя цягнулі адзін за адным.

Калі 13 ліпеня юныя артысты выканаюць песню кампазітара сваёй краіны на роднай мове, то 14 чысла прадставяць на суд гледача і журы кампазіцыю на ўласны выбар. Абодва конкурсныя дні пройдуць у гасціннай канцэртнай зале "Віцебск". У групах падтанцоўкі юных зорачак будуць дзіцячыя танцавальныя калектывы і тэатры эстрады.

Ацэньваць вакал, артыстызм і ў цэлым вобраз удзельнікаў будзе міжнароднае журы на чале са старшынёй, народным артыстам Беларусі Васілём Раінчыкам. Разам з ім у склад "экспертнай групы" ўвойдуць 7 чалавек - кампазітары, музыканты і спевакі з Расіі, Казахстана, Літвы, Сербіі, Славакіі, Босніі і Герцагавіны. Знамянальна, што некаторыя з іх ужо прывозілі ў свае краіны ўзнагароды віцебскага "Славянскага базару". У прыватнасці, казахстанскі спявак і кампазітар Алішэр Карымаў стаў уладальнікам ІІІ прэміі Міжнароднага конкурсу маладых выканаўцаў "Віцебск-2011", а выканаўца з Сербіі Ірына Арсеніевіч - лаўрэатам аналагічнага творчага спаборніцтва ў 2021 годзе.

Як адзначаюць арганізатары, найбольш таленавітага ўдзельніка 20-га дзіцячага музычнага конкурсу чакае новая прэмія - узнагарода імя Народнага артыста СССР і Беларусі Ігара Лучанка. Каму яна дастанецца - стане вядома ўжо ў бліжэйшыя дні.

Святочныя акорды XXXI Міжнароднага фестывалю мастацтваў "Славянскі базар у Віцебску" будуць гучаць з 13 па 18 ліпеня. Цырымоніі адкрыцця і закрыцця форуму запланаваны на 14 і 17 ліпеня.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі