14 верасня, Брэст /Святлана Вячорка - БЕЛТА/. "Белая вежа" дае спектаклям пуцёўку ў фестывальнае жыццё. Такое меркаванне выказаў карэспандэнту БЕЛТА член экспертнага савета XXIII Міжнароднага тэатральнага фестывалю, загадчыца літаратурнай часткі Маскоўскага тэатра юнага гледача, выкладчык кафедры гісторыі замежнага тэатра Расійскага інстытута тэатральнага мастацтва Уладзіслава Купрына.
Тэатральны крытык другі раз прыязджае на "Белую вежу". "Праз месяц я буду працаваць у Маскве на фестывалі. Там будзе прадстаўлены спектакль "Споведзь" Македонскага нацыянальнага тэатра, які ў мінулым годзе паказвалі тут, у Брэсце. Інакш кажучы арганізатары "Белай вежы", відаць, не памыляюцца, таму што спектакль ідзе далей па фестывалях. Гэта сведчыць аб узроўні форуму", - сказала Уладзіслава Купрына.
Член журы расійскіх тэатральных фестываляў адзначае размах "Белай вежы". "Гэта вялікі цудоўны фестываль: 25 спектакляў - такі размах сапраўдны. Праграма вельмі разнастайная, ёсць дзіцячыя спектаклі. Вось цяпер "Белавежка" з'явілася, дзе ўдзельнічаюць непрафесійныя падлеткавыя і юнацкія тэатральныя калектывы. Я паглядзела спектакль "Наша жыццё - вялікі сцэнарый" Баранавіцкага тэатра-студыі "Паралель" - яны паказалі вельмі высокі ўзровень харэаграфіі", - лічыць Уладзіслава Купрына.
Насычаную праграму "Белай вежы" адзначыў у гутарцы з карэспандэнтам БЕЛТА і мастацкі кіраўнік Нацыянальнага акадэмічнага драматычнага тэатра імя Янкі Купалы Мікалай Пінігін. "Вельмі добра, што ён ёсць, гэты фестываль. Таму што іх мала ў Беларусі, гэта затратная рэч. Дзякуй, што і гарадскія ўлады дапамагаюць, і тэатр стараецца", - дадаў рэжысёр.
Паводле слоў Мікалая Пінігіна, купалаўцы заўсёды з удзячнасцю прымаюць запрашэнне на фестываль. На гэты раз яны прывезлі адну з апошніх сваіх прэм'ер - спектакль "Рэвізор" паводле аднайменнай камедыі Гогаля. "З задавальненнем трупа ездзіць, таму што без гастролей спектакль карацей жыве. Сустрэча з новым гледачом, з новым горадам - гэта заўсёды добра для артыстаў, тэатра. Тым больш нас вельмі добра прымаюць тут", - рэзюмаваў ён.
XXIII Міжнародны тэатральны фестываль "Белая вежа" праходзіць у Брэсце з 11 па 16 верасня. -0-
