15 лютага, Мінск /Кар. БЕЛТА/. II Адкрыты рэспубліканскі конкурс харэаграфічнага майстэрства "Час танцаваць - 2023", арганізатарам якога выступае Рэспубліканскі культурна-асветны цэнтр Кіраўніцтва справамі Прэзідэнта Беларусі, правядуць у Мінску 8 красавіка, паведамляе карэспандэнт БЕЛТА.
Прыём заявак на конкурс адкрыты, пазмагацца за званне лепшага могуць салісты, ансамблі і танцавальныя калектывы з Беларусі і іншых краін. Удзел могуць прыняць як дарослыя, так і дзеці ў сваіх узроставых катэгорыях. "Мы крыху ўскладнім першы этап адбору. Будзем уважліва праглядаць усе заяўкі перад тым як пацвердзіць, што калектыў сапраўды дапушчаны да фіналу, які адбудзецца на сцэне канцэртнай залы "Мінск". Мы рыхтаваліся да гэтага праекта даволі доўга, на працягу года. На сённяшні дзень сфарміраваны бюджэт праекта, рабочыя групы, у кожнай свой напрамак. Мы рыхтуемся сустрэць тут удзельнікаў, стварыць для іх максімальна спрыяльныя ўмовы", - расказаў на прэс-канферэнцыі дырэктар Рэспубліканскага культурна-асветнага цэнтра Кіраўніцтва справамі Прэзідэнта Беларусі Аляксандр Сідарэнка.
Чакаецца, што аб сваім таленце заявяць больш за 1 тыс. удзельнікаў з розных рэгіёнаў краіны. Пераможцаў вызначаць у сямі намінацыях: класічная харэаграфія, сучасная харэаграфія, эстрадная харэаграфія, народны (фальклорны) танец і народна-стылізаваны танец, бальныя танцы, альтэрнатыўны напрамак (хіп-хоп, брэйк-данс, попінг, локінг, франк, RnB), свабодны напрамак.
"Мы захоўваем памер гран-пры 200 базавых велічынь. Гэта сёння Br7,4 тыс. Упэўнены, што калектыву-пераможцу гэта дае дадатковыя магчымасці для развіцця, прадаўжэння творчай дзейнасці", - адзначыў Аляксандр Сідарэнка.
Конкурс прадугледжвае насычаную канцэртную і адукацыйную праграмы. "На мой погляд, у мінулым годзе вельмі дарэчы была праграма майстар-класаў, мы яе плануем прадоўжыць. Больш таго, мы хацелі б прапанаваць яшчэ курс для кіраўнікоў калектываў - удзельнікаў нашага праекта. Гэта значыць, мы не будзем абмяжоўвацца, хутчэй за ўсё, рамкамі конкурснага дня, адборачнага тура. Для калектываў-удзельнікаў, кіраўнікоў мы на працягу года прапануем бясплатны курс майстар-класаў. Пастараемся прыцягнуць сюды і педагогаў, і вядучых майстроў сцэны, і заслужаных людзей, якія працуюць у гэтай галіне", - дапоўніў дырэктар цэнтра.
Майстэрства канкурсантаў будзе ацэньваць прафесійнае журы, у склад якога ўвойдуць аўтарытэтныя дзеячы культуры і мастацтва, арганізатары і партнёры конкурсу. Старшынёй журы выступіць Святлана Гуткоўская, загадчыца кафедры харэаграфіі, прафесар Беларускага дзяржаўнага ўніверсітэта культуры і мастацтваў, член экспертнага савета фонду Прэзідэнта Беларусі па падтрымцы культуры і мастацтва.
Конкурс пройдзе пры падтрымцы Міністэрства інфармацыі і Нацыянальнага прэс-цэнтра. Генеральны партнёр праекта - ААТ "ААБ Беларусбанк".-0-
